anasir ki ghani zanjir hai

anāsir kī ghanī zanjīr hai

so ye hastī kī ik ta.abīr hai

milā virse meñ dard-e-dil mujhe

ye mere baap kī jāgīr hai

pighal jā.egā parbat sañg kyā

mirī aahoñ meñ vo tāsīr hai

kahīñ rāñjhā, kahīñ majnūñ huā

vajūd-e-ishq ālamgīr hai

vahī parvez kī sharteñ hanūz

vahī tesha hai, jū-e-shīr hai

surūr o ġham hai kyā 'ḳhālid'-miyāñ

kitāb-e-zīst kī tafsīr hai

anasir ki ghani zanjir hai

so ye hasti ki ek tabir hai

mila wirse mein dard-e-dil mujhe

ye mere bap ki jagir hai

pighal jaega parbat sang kya

meri aahon mein wo tasir hai

kahin ranjha, kahin majnun hua

wajud-e-ishq aalamgir hai

wahi parwez ki sharten hanuz

wahi tesha hai, ju-e-shir hai

surur o gham hai kya 'KHalid'-miyan

kitab-e-zist ki tafsir hai