andhe adam wajud ke girdab se nikal

andhe adam vajūd ke girdāb se nikal

ye zindagī bhī ḳhvāb hai tū ḳhvāb se nikal

sūraj se apne bichhḌī huī ik kiran hai tū

terā nasīb jism ke barfāb se nikal

tū miTTī paanī aag havā meñ hai qaid kyuuñ

hone kā de javāz tab-o-tāb se nikal

phūloñ meñ chāñd tāroñ meñ sūraj meñ us ko dekh

in pattharoñ ke mimbar o mehrāb se nikal

murjhā na jaa.e dekh kahīñ ruuh kā gulāb

faanī jahāñ kī vādi-e-shādāb se nikal

ban ke jazīra ubhregā kirdār ḳhud tirā

ḳhush-rañg ḳhvāhishoñ ke tū sailāb se nikal

kahtī haiñ mujh se soch samundar kī vus.ateñ

'ārif' tū apnī zaat ke tālāb se nikal

andhe adam wajud ke girdab se nikal

ye zindagi bhi KHwab hai tu KHwab se nikal

suraj se apne bichhDi hui ek kiran hai tu

tera nasib jism ke barfab se nikal

tu miTTi pani aag hawa mein hai qaid kyun

hone ka de jawaz tab-o-tab se nikal

phulon mein chand taron mein suraj mein us ko dekh

in pattharon ke mimbar o mehrab se nikal

murjha na jae dekh kahin ruh ka gulab

fani jahan ki wadi-e-shadab se nikal

ban ke jazira ubhrega kirdar KHud tera

KHush-rang KHwahishon ke tu sailab se nikal

kahti hain mujh se soch samundar ki wusaten

'arif' tu apni zat ke talab se nikal