luTa raha hun main lal-o-gohar andhere mein

luTā rahā huuñ maiñ la.al-o-gohar añdhere meñ

talāsh kartī hai kis ko nazar añdhere meñ

vo jis kī raah meñ maiñ ne diye jalā.e the

gayā vo shaḳhs mujhe chhoḌ kar añdhere meñ

charāġh kaun uThā le gayā mire ghar se

sisak rahe haiñ mire bām-o-dar añdhere meñ

thā tīrgī ke janāze pe ek hashr bapā

jo us ke aane se phailī ḳhabar añdhere meñ

koī hathelī pe phirtā hai āftāb liye

bhaTak rahā hai koī dar-ba-dar añdhere meñ

meñ koh-e-nūr huuñ nādāñ tujhe ḳhabar bhī nahīñ

mujhe chhupāne kī koshish na kar añdhere meñ

musāfiroñ ko vo rāheñ dikhā.egā 'afzal'

charāġh rakh do sar-e-rahguzar añdhere meñ

luTa raha hun main lal-o-gohar andhere mein

talash karti hai kis ko nazar andhere mein

wo jis ki rah mein main ne diye jalae the

gaya wo shaKHs mujhe chhoD kar andhere mein

charagh kaun uTha le gaya mere ghar se

sisak rahe hain mere baam-o-dar andhere mein

tha tirgi ke janaze pe ek hashr bapa

jo us ke aane se phaili KHabar andhere mein

koi hatheli pe phirta hai aaftab liye

bhaTak raha hai koi dar-ba-dar andhere mein

mein koh-e-nur hun nadan tujhe KHabar bhi nahin

mujhe chhupane ki koshish na kar andhere mein

musafiron ko wo rahen dikhaega 'afzal'

charagh rakh do sar-e-rahguzar andhere mein