anjam KHushi ka duniya mein sach kahte ho gham hota hai

anjām ḳhushī kā duniyā meñ sach kahte ho ġham hotā hai

sābit hai gul aur shabnam se jo hañstā hai vo rotā hai

ham shauq kā naama likhte haiñ ki sabr ai dil kyuuñ rotā hai

ye kyā tarkīb hai ai zālim ham likhte haiñ tū dhotā hai

hai dil ik mard-e-āḳhir-bīñ apne āmāl par rotā hai

gar Duub ke dekho ashk nahīñ motī se kuchh ye pirotā hai

ghar is se ishq kā bantā hai dil saḳhtī se kyuuñ ghabrā.e

shīrīñ ye mahal uThvātī hai farhād ye patthar Dhotā hai

Thukrā kar naash har iisā kahtā hai naaz se ho barham

uTh jald khaḌe haiñ der se ham kin nīndoñ ġhāfil sotā hai

ham ro ro ashk bahāte haiñ vo tūfāñ baiThe uThāte haiñ

yuuñ hañs hañs kar farmāte haiñ kyuuñ mard kā naam Dubotā hai

kyā sañg-dilī hai ulfat meñ ham jis kī jaan se jaate haiñ

anjān vo ban kar kahtā hai kyuuñ jaan ye apnī khotā hai

le de ke saare aalam meñ hamdard jo pūchho ik dil hai

maiñ dil ke haal pe rotā huuñ dil mere haal pe rotā hai

dukh dard ne aisā zaar kiyā ik gaam bhī chalnā dūbhar hai

chaliye to jism-e-zār apnā ḳhud raah meñ kāñTe botā hai

vo umañg kahāñ vo shabāb kahāñ hue donoñ nazr-e-ishq-mizha

pūchho mat aalam dil kā mire nishtar sā koī chubhotā hai

anjam KHushi ka duniya mein sach kahte ho gham hota hai

sabit hai gul aur shabnam se jo hansta hai wo rota hai

hum shauq ka nama likhte hain ki sabr ai dil kyun rota hai

ye kya tarkib hai ai zalim hum likhte hain tu dhota hai

hai dil ek mard-e-aKHir-bin apne aamal par rota hai

gar Dub ke dekho ashk nahin moti se kuchh ye pirota hai

ghar is se ishq ka banta hai dil saKHti se kyun ghabrae

shirin ye mahal uThwati hai farhad ye patthar Dhota hai

Thukra kar nash har isa kahta hai naz se ho barham

uTh jald khaDe hain der se hum kin nindon ghafil sota hai

hum ro ro ashk bahate hain wo tufan baiThe uThate hain

yun hans hans kar farmate hain kyun mard ka nam Dubota hai

kya sang-dili hai ulfat mein hum jis ki jaan se jate hain

anjaan wo ban kar kahta hai kyun jaan ye apni khota hai

le de ke sare aalam mein hamdard jo puchho ek dil hai

main dil ke haal pe rota hun dil mere haal pe rota hai

dukh dard ne aisa zar kiya ek gam bhi chalna dubhar hai

chaliye to jism-e-zar apna KHud rah mein kanTe bota hai

wo umang kahan wo shabab kahan hue donon nazr-e-ishq-mizha

puchho mat aalam dil ka mere nishtar sa koi chubhota hai