ashk betab wa nigah be-bak wa chashm-e-tar KHarab

ashk betāb va nigah be-bāk va chashm-e-tar ḳharāb

chashm-e-bīnā se agar dekho to ghar kā ghar ḳharāb

girya be-tāsīr o fariyād-e-dil-e-muztarib ḳharāb

kār-e-ishq-o-āshiqī nāqis tamām aksar ḳharāb

ik hamārā naam jo pahuñche na terī bazm tak

ik hamārī ḳhaak hai jo phirtī hai dar dar ḳharāb

hai adab se nutq band ab kyā bayāñ ho mudda.ā

pahle hī yahāñ ho chukā guftār kā daftar ḳharāb

dil ḳharāb aur sab havā-o-hirs-e-dil bekār hai

hai fazā-e-dahr meñ hāl-e-but-o-but-gar ḳharāb

jaan hī jaatī hai guftār-e-shakar-ālūd par

bul-havas se niyyat-e-āshiq hai kuchh baḌh kar ḳharāb

shab-e-adū ke saath din ko mujh se chhupte phirte ho

al-ġharaz phirte ho yuuñ hī rāt-bhar din-bhar ḳharāb

dil ḳharābāt-e-muġhāñ se ham uThā sakte nahīñ

ho ga.e is ḳhāk-dāñ meñ chaar din rah kar ḳharāb

phoḌnā sar kā hī aa Thahrā to lākhoñ sañg haiñ

kījiye kyuuñ āstān-e-yār kā patthar ḳharāb

jo muqābil meñ balā aa.e vo maujūd us meñ hai

dil huā apnā safā se ā.īna ban kar ḳharāb

ik sanam ke haath bik jaatā na phirtā dar-ba-dar

but-faroshī se huā hai kis qadar aazar ḳharāb

lutf-e-sāqī aam thā par vā-e-baḳht andalīb

jām-e-gil bekār niklā sāġhar-e-ab.har ḳharāb

mere dil meñ ek dam aate nahīñ misl-e-murād

ho ga.e aġhyār kī āñkhoñ meñ tum rah kar ḳharāb

tum kisī va.ada se phir jaao ki ho jā.ūñ tamām

ho agar phirne meñ mere halq par ḳhanjar ḳharāb

munharif ham dekhte haiñ kuchh nigāh-e-tez tez

kis rag-e-jāñ se huā hai ye sar-e-nashtar ḳharāb

ārzū-e-qatl bar aa.ī to kyā bar aa.ī ḳhaak

kuchh yahāñ qismat burī kuchh vahāñ dam-e-ḳhanjar ḳharāb

yuuñ ḳharābāt-e-muġhāñ bhī hai ḳharāb-e-rozgār

lekin us se bhī hai kuchh terā dil-e-'anvar' ḳharāb

ashk betab wa nigah be-bak wa chashm-e-tar KHarab

chashm-e-bina se agar dekho to ghar ka ghar KHarab

girya be-tasir o fariyaad-e-dil-e-muztarib KHarab

kar-e-ishq-o-ashiqi naqis tamam aksar KHarab

ek hamara nam jo pahunche na teri bazm tak

ek hamari KHak hai jo phirti hai dar dar KHarab

hai adab se nutq band ab kya bayan ho muddaa

pahle hi yahan ho chuka guftar ka daftar KHarab

dil KHarab aur sab hawa-o-hirs-e-dil bekar hai

hai faza-e-dahr mein haal-e-but-o-but-gar KHarab

jaan hi jati hai guftar-e-shakar-alud par

bul-hawas se niyyat-e-ashiq hai kuchh baDh kar KHarab

shab-e-adu ke sath din ko mujh se chhupte phirte ho

al-gharaz phirte ho yun hi raat-bhar din-bhar KHarab

dil KHarabaat-e-mughan se hum uTha sakte nahin

ho gae is KHak-dan mein chaar din rah kar KHarab

phoDna sar ka hi aa Thahra to lakhon sang hain

kijiye kyun aastan-e-yar ka patthar KHarab

jo muqabil mein bala aae wo maujud us mein hai

dil hua apna safa se aaina ban kar KHarab

ek sanam ke hath bik jata na phirta dar-ba-dar

but-faroshi se hua hai kis qadar aazar KHarab

lutf-e-saqi aam tha par wa-e-baKHt andalib

jam-e-gil bekar nikla saghar-e-abhar KHarab

mere dil mein ek dam aate nahin misl-e-murad

ho gae aghyar ki aankhon mein tum rah kar KHarab

tum kisi wada se phir jao ki ho jaun tamam

ho agar phirne mein mere halq par KHanjar KHarab

munharif hum dekhte hain kuchh nigah-e-tez tez

kis rag-e-jaan se hua hai ye sar-e-nashtar KHarab

aarzu-e-qatl bar aai to kya bar aai KHak

kuchh yahan qismat buri kuchh wahan dam-e-KHanjar KHarab

yun KHarabaat-e-mughan bhi hai KHarab-e-rozgar

lekin us se bhi hai kuchh tera dil-e-'anwar' KHarab