un se hum lau lagae baiThe hain

un se ham lau lagā.e baiThe haiñ

aag dil meñ dabā.e baiThe haiñ

vo jo gardan jhukā.e baiThe haiñ

hashr kyā kyā uThā.e baiThe haiñ

tere kūche ke baiThne vaale

apnī hastī miTā.e baiThe haiñ

zor bal uf-re is nazākat par

ḳhalq kā dil dukhā.e baiThe haiñ

kyuuñ uTheñ un kī bazm se aġhyār

rang apnā jamā.e baiThe haiñ

kuchh nahīñ ḳhāk-e-dasht-e-ulfat meñ

ham bahut ḳhaak uḌaa.e baiThe haiñ

ham nahīñ aap meñ ḳhushī se ki vo

ghar meñ mehmān aa.e baiThe haiñ

kyuuñ na phailā.eñ paaoñ bazm meñ ġhair

aap ke sar chaḌhā.e baiThe haiñ

jañg-jū vo milāp meñ bhī rahe

mujh se āñkheñ laḌā.e baiThe haiñ

dil ke khoTe haiñ sab ye sīm-andām

ḳhuub ham āzmā.e baiThe haiñ

husn-e-nazzāra-soz hai parda

go vo parda uThā.e baiThe haiñ

us kī aariz se rū-kashī kaisī

gul pe ham ḳhaar khaa.e baiThe haiñ

jiite haiñ naam ko vagarna ham

ishq meñ jī khapā.e baiThe haiñ

haar dekhā bhī ḳhūn-e-āshiq kā

aap aur sar jhukā.e baiThe haiñ

kyuuñ ki bigḌā huā unheñ kahiye

bigḌe aur muñh banā.e baiThe haiñ

jī churānā aur us pe haa.e sitam

aap āñkheñ churā.e baiThe haiñ

sharm bhī ik tarah kī chorī hai

vo badan ko churā.e baiThe haiñ

jo ki baiThe haiñ un kī pesh-e-nigāh

maut aane kī jaa.e baiThe haiñ

dekh saaqī ko apne dariyā-dil

zarf-e-mai-kash baḌhā.e baiThe haiñ

us ke dar se lagā ke maqtal tak

jaañ fidā jaa.e jaa.e baiThe haiñ

ġhair bātoñ se aur ham āñkhoñ se

ek tūfāñ uThā.e baiThe haiñ

hai ye raushan ki hai hijāb meñ chāñd

aap kyā muñh chhupā.e baiThe haiñ

is ḳhushī meñ hinā lagāte haiñ

ki mirā ḳhuuñ bahā.e baiThe haiñ

jāntā huuñ ki qatl par mere

aap beḌā uThā.e baiThe haiñ

mere dil soz ban ke yaar mire

muft jī ko jalā.e baiThe haiñ

kyā sikhā.egā un ko zulm-e-falak

ḳhud vo sīkhe-sikhā.e baiThe haiñ

hai jahāñ is se faizyāb 'anvar'

jis ke dar par ham aa.e baiThe haiñ

un se hum lau lagae baiThe hain

aag dil mein dabae baiThe hain

wo jo gardan jhukae baiThe hain

hashr kya kya uThae baiThe hain

tere kuche ke baiThne wale

apni hasti miTae baiThe hain

zor bal uf-re is nazakat par

KHalq ka dil dukhae baiThe hain

kyun uThen un ki bazm se aghyar

rang apna jamae baiThe hain

kuchh nahin KHak-e-dasht-e-ulfat mein

hum bahut KHak uDae baiThe hain

hum nahin aap mein KHushi se ki wo

ghar mein mehman aae baiThe hain

kyun na phailaen paon bazm mein ghair

aap ke sar chaDhae baiThe hain

jang-ju wo milap mein bhi rahe

mujh se aankhen laDae baiThe hain

dil ke khoTe hain sab ye sim-andam

KHub hum aazmae baiThe hain

husn-e-nazzara-soz hai parda

go wo parda uThae baiThe hain

us ki aariz se ru-kashi kaisi

gul pe hum KHar khae baiThe hain

jite hain nam ko wagarna hum

ishq mein ji khapae baiThe hain

haar dekha bhi KHun-e-ashiq ka

aap aur sar jhukae baiThe hain

kyun ki bigDa hua unhen kahiye

bigDe aur munh banae baiThe hain

ji churana aur us pe hae sitam

aap aankhen churae baiThe hain

sharm bhi ek tarah ki chori hai

wo badan ko churae baiThe hain

jo ki baiThe hain un ki pesh-e-nigah

maut aane ki jae baiThe hain

dekh saqi ko apne dariya-dil

zarf-e-mai-kash baDhae baiThe hain

us ke dar se laga ke maqtal tak

jaan fida jae jae baiThe hain

ghair baaton se aur hum aankhon se

ek tufan uThae baiThe hain

hai ye raushan ki hai hijab mein chand

aap kya munh chhupae baiThe hain

is KHushi mein hina lagate hain

ki mera KHun bahae baiThe hain

jaanta hun ki qatl par mere

aap beDa uThae baiThe hain

mere dil soz ban ke yar mere

muft ji ko jalae baiThe hain

kya sikhaega un ko zulm-e-falak

KHud wo sikhe-sikhae baiThe hain

hai jahan is se faizyab 'anwar'

jis ke dar par hum aae baiThe hain