اپنا کہتے ہیں مگر اپنا بناتے کب ہیں

اپنا کہتے ہیں مگر اپنا بناتے کب ہیں

وعدہ کرتے ہیں مگر لوگ نبھاتے کب ہیں

یار تو آس نہ کر اس کے پلٹ آنے کی

جو چلے جاتے ہیں وہ لوٹ کے آتے کب ہیں

ہم کو کرنا ہے سفر ان کی گلی کا لیکن

دیکھنا ہے کہ وہ ہم کو بھی بلاتے کب ہیں

مشورے دیتے سبھی لوگ جہاں کے پر وہ

ساتھ دینے کے لیے ہاتھ بڑھاتے کب ہیں

کوئی اس کو بھی ذرا یہ تو بتائے جا کر

پیار کرتے ہیں جسے اس کو بھلاتے کب ہیں

اب دھرمؔ کی تو دعا میں بھی اثر ہو کیسے

ہم عبادت کے لیے ہاتھ اٹھاتے کب ہیں