apne darun-e-jism se bad-KHu nikaliye

apne darūn-e-jism se bad-ḳhū nikāliye

ik devtā ke ruup meñ sādhū nikāliye

jo tīrgī ke ḳhauf se ḳhāmosh ho ga.ī

us raat ke liye ka.ī jugnū nikāliye

iblīs guzre daur kā zinda hai aaj bhī

us kī qazā ke vāste chāqū nikāliye

koī maza nahīñ hai siyāsat meñ āj-kal

dair-o-haram se koī to jaadū nikāliye

uḌte nahīñ haiñ baaz ke bachche muñDer par

chhūnā hai āsmān to baazū nikāliye

mahsūs ho mujhe tire ehsās kī mahak

kāġhaz ke phuul se koī ḳhushbū nikāliye

pahle to kījiye kisī dāman kā intizām

phir us ke baa'd aañkh se aañsū nikāliye

matlab kī baat thī zarā ham bhī to jaan leñ

do-chār us kī baat ke pahlū nikāliye

apne darun-e-jism se bad-KHu nikaliye

ek dewta ke rup mein sadhu nikaliye

jo tirgi ke KHauf se KHamosh ho gai

us raat ke liye kai jugnu nikaliye

iblis guzre daur ka zinda hai aaj bhi

us ki qaza ke waste chaqu nikaliye

koi maza nahin hai siyasat mein aaj-kal

dair-o-haram se koi to jadu nikaliye

uDte nahin hain baz ke bachche munDer par

chhuna hai aasman to bazu nikaliye

mahsus ho mujhe tere ehsas ki mahak

kaghaz ke phul se koi KHushbu nikaliye

pahle to kijiye kisi daman ka intizam

phir us ke ba'd aankh se aansu nikaliye

matlab ki baat thi zara hum bhi to jaan len

do-chaar us ki baat ke pahlu nikaliye