apne gharib dil ki baat karte hain raegan kahan

apne ġharīb dil kī baat karte haiñ rā.egāñ kahāñ

ye bhī na ham samajh sake apnā koī yahāñ kahāñ

un ke liye vo āsmān merā guzar vahāñ kahāñ

mere liye yahī zamīn ā.eñge vo yahāñ kahāñ

sāmnā un kā jab huā āñkhoñ ne jo kahā kahā

dil meñ hazār ishtiyāq un meñ magar zabāñ kahāñ

uf ye ma.āl-e-justajū ba.ad-e-kamāl-e-justajū

pahuñche vahī jagah kahne lagī yahāñ kahāñ

hadd-e-nazar kā hai fareb qurb-e-zamīn-o-āsmāñ

varna mirī zamīn se miltā hai āsmāñ kahāñ

husn kā pāsbān ishq ishq kā pāsbān dil

dil kā hai pāsbān hosh hosh kā pāsbāñ kahāñ

manzil-e-āshiqī se kam rukne kī jā nahīñ 'iram'

ye to abhī hai rah-guzar baiTh ga.e yahāñ kahāñ

apne gharib dil ki baat karte hain raegan kahan

ye bhi na hum samajh sake apna koi yahan kahan

un ke liye wo aasman mera guzar wahan kahan

mere liye yahi zamin aaenge wo yahan kahan

samna un ka jab hua aankhon ne jo kaha kaha

dil mein hazar ishtiyaq un mein magar zaban kahan

uf ye maal-e-justaju baad-e-kamal-e-justaju

pahunche wahi jagah kahne lagi yahan kahan

hadd-e-nazar ka hai fareb qurb-e-zamin-o-asman

warna meri zamin se milta hai aasman kahan

husn ka pasban ishq ishq ka pasban dil

dil ka hai pasban hosh hosh ka pasban kahan

manzil-e-ashiqi se kam rukne ki ja nahin 'iram'

ye to abhi hai rah-guzar baiTh gae yahan kahan