apne ghar se uske ghar ka fasla tha muKHtasar

apne ghar se us ke ghar kā fāsla thā muḳhtasar

zindagī darkār thī go rāsta thā muḳhtasar

zindagī kā zindagī se rābta thā muḳhtasar

us ne dekhā maiñ ne dekhā vāqi'a thā muḳhtasar

aap bhī apne kiye par kuchh pashemāñ se lage

maiñ bhī ye sochā kiyā ik hādisa thā muḳhtasar

aisī rāteñ aaj bhī āñkhoñ meñ kaTtī haiñ mirī

zindagī kā jin se shāyad vāsta thā muḳhtasar

mere maazī kā ta'alluq mere mustaqbil ke saath

ik haqīqat thī magar ik fāsla thā muḳhtasar

ik haqīqat thā magar huuñ aaj be-tā’bīr ḳhvāb

ab kahānī huuñ kabhī ik vāqi'a thā muḳhtasar

aaj un āñkhoñ ne mere dil meñ phir jhāñkā 'atīq'

aaj un āñkhoñ meñ phir ik hausla thā muḳhtasar

apne ghar se us ke ghar ka fasla tha muKHtasar

zindagi darkar thi go rasta tha muKHtasar

zindagi ka zindagi se rabta tha muKHtasar

us ne dekha main ne dekha waqi'a tha muKHtasar

aap bhi apne kiye par kuchh pasheman se lage

main bhi ye socha kiya ek hadisa tha muKHtasar

aisi raaten aaj bhi aankhon mein kaTti hain meri

zindagi ka jin se shayad wasta tha muKHtasar

mere mazi ka ta'alluq mere mustaqbil ke sath

ek haqiqat thi magar ek fasla tha muKHtasar

ek haqiqat tha magar hun aaj be-ta’bir KHwab

ab kahani hun kabhi ek waqi'a tha muKHtasar

aaj un aankhon ne mere dil mein phir jhanka 'atiq'

aaj un aankhon mein phir ek hausla tha muKHtasar