apne gird-o-pesh ka bhi kuchh pata rakh
apne gird-o-pesh kā bhī kuchh patā rakh
dil kī duniyā to magar sab se judā rakh
likh bayāz-e-marg meñ har jā anal-haq
aur kitāb-e-zīst meñ bāb-e-ḳhudā rakh
us kī rañgat aur nikhregī ḳhizāñ meñ
ye ġhamoñ kī shāḳh hai is ko harā rakh
aa hī jā.egī udāsī baal khole
aaj apne dil kā darvāza khulā rakh
yuuñ bhī bah jā.egā sab sail-e-balā meñ
apne ghar ke sab dar-o-dīvār Dhā rakh
nā-murādī kā unheñ bhī tajraba ho
un ke raste meñ bhī koī sānehā rakh
sansanātī raat ke aane se pahle
dil meñ jaatī dhuup kā TukḌā sajā rakh
besh-qīmat haiñ ye dil ke zaḳhm 'pāshī'
in charāġhoñ ko havāoñ se bachā rakh
apne gird-o-pesh ka bhi kuchh pata rakh
dil ki duniya to magar sab se juda rakh
likh bayaz-e-marg mein har ja anal-haq
aur kitab-e-zist mein bab-e-KHuda rakh
us ki rangat aur nikhregi KHizan mein
ye ghamon ki shaKH hai is ko hara rakh
aa hi jaegi udasi baal khole
aaj apne dil ka darwaza khula rakh
yun bhi bah jaega sab sail-e-bala mein
apne ghar ke sab dar-o-diwar Dha rakh
na-muradi ka unhen bhi tajraba ho
un ke raste mein bhi koi saneha rakh
sansanati raat ke aane se pahle
dil mein jati dhup ka TukDa saja rakh
besh-qimat hain ye dil ke zaKHm 'pashi'
in charaghon ko hawaon se bacha rakh
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
