apne haalat ke dhagon se buni hai maine

apne hālāt ke dhāgoñ se bunī hai maiñ ne

aaj ik taaza ġhazal aur kahī hai maiñ ne

kis zarūrat ko dabā.ūñ kise puurā kar luuñ

apnī tanḳhvāh ka.ī baar ginī hai maiñ ne

chhoTe logoñ ko baḌā kahnā paḌā hai aksar

ek taklīf ka.ī baar sahī hai maiñ ne

zindagī ne mujhe siine se lagā rakkhā hai

jaan jis din se hathelī pe dharī hai maiñ ne

maiñ to jaisā bhī huuñ sab log mujhe jānte haiñ

tere baare meñ bhī ik baat sunī hai maiñ ne

apne 'aiboñ ko 'ayāñ kar ke ḳhajil huuñ lekin

ye jasārat bhī agar kī hai to kī hai maiñ ne

mere she'roñ meñ dhaḌaktā hai mire 'ahd kā dil

shā'irī kī hai ki tārīḳh likhī hai maiñ ne

ek se dūsrā insān judā hai 'nusrat'

har jabīñ pe na.ī tahrīr paḌhī hai maiñ ne

apne haalat ke dhagon se buni hai main ne

aaj ek taza ghazal aur kahi hai main ne

kis zarurat ko dabaun kise pura kar lun

apni tanKHwah kai bar gini hai main ne

chhoTe logon ko baDa kahna paDa hai aksar

ek taklif kai bar sahi hai main ne

zindagi ne mujhe sine se laga rakkha hai

jaan jis din se hatheli pe dhari hai main ne

main to jaisa bhi hun sab log mujhe jaante hain

tere bare mein bhi ek baat suni hai main ne

apne 'aibon ko 'ayan kar ke KHajil hun lekin

ye jasarat bhi agar ki hai to ki hai main ne

mere she'ron mein dhaDakta hai mere 'ahd ka dil

sha'iri ki hai ki tariKH likhi hai main ne

ek se dusra insan juda hai 'nusrat'

har jabin pe nai tahrir paDhi hai main ne