apne hi KHun se is tarah adawat mat kar

apne hī ḳhuun se is tarah adāvat mat kar

zinda rahnā hai to sāñsoñ se baġhāvat mat kar

siikh le pahle ujāloñ kī hifāzat karnā

sham.a bujh jaa.e to āñdhī se shikāyat mat kar

sar kī bāzār-e-siyāsat meñ nahīñ hai qīmat

sar pe jab taaj nahīñ hai to hukūmat mat kar

ḳhvāb ho jaam ho taara ho ki mahbūb kā dil

TūTne vaalī kisī shai se mohabbat mat kar

dekh phir dast-e-zarūrat meñ na bik jaa.e zamīr

zar ke badle meñ usūloñ kī tijārat mat kar

pursish-e-hāl se ho jā.eñge phir zaḳhm hare

is se behtar hai yahī merī ayādat mat kar

sar jhukāne ko hī sajda nahīñ kahte 'dānā'

jis meñ dil bhī na jhuke aisī ibādat mat kar

apne hi KHun se is tarah adawat mat kar

zinda rahna hai to sanson se baghawat mat kar

sikh le pahle ujalon ki hifazat karna

shama bujh jae to aandhi se shikayat mat kar

sar ki bazar-e-siyasat mein nahin hai qimat

sar pe jab taj nahin hai to hukumat mat kar

KHwab ho jam ho tara ho ki mahbub ka dil

TuTne wali kisi shai se mohabbat mat kar

dekh phir dast-e-zarurat mein na bik jae zamir

zar ke badle mein usulon ki tijarat mat kar

pursish-e-haal se ho jaenge phir zaKHm hare

is se behtar hai yahi meri ayaadat mat kar

sar jhukane ko hi sajda nahin kahte 'dana'

jis mein dil bhi na jhuke aisi ibaadat mat kar