apne hisar-e-zat mein uljha hua hun main

apne hisār-e-zāt meñ uljhā huā huuñ maiñ

ya.anī ki kā.enāt meñ uljhā huā huuñ maiñ

qaabū meñ aaj dil nahīñ kyā ho gayā mujhe

phir aaj ḳhvāhishāt meñ uljhā huā huuñ maiñ

jaise ki hone vaalī hai anhonī phir koī

har-pal tavahhumāt meñ uljhā huā huuñ maiñ

kuchh apnā farz pyaar tirā fikr-e-rozgār

kitne hī vārdāt meñ uljhā huā huuñ maiñ

fursat kahāñ banā.ūñ marāsim na.e na.e

pichhle ta.alluqāt meñ uljhā huā huuñ maiñ

sab haiñ asīr-e-ranj-o-alam is jahān meñ

tanhā kahāñ hayāt meñ uljhā huā huuñ maiñ

'nāyāb' jab nahīñ hai vafāoñ kā us ko paas

phir kyuuñ takallufāt meñ uljhā huā huuñ maiñ

apne hisar-e-zat mein uljha hua hun main

yani ki kaenat mein uljha hua hun main

qabu mein aaj dil nahin kya ho gaya mujhe

phir aaj KHwahishat mein uljha hua hun main

jaise ki hone wali hai anhoni phir koi

har-pal tawahhumat mein uljha hua hun main

kuchh apna farz pyar tera fikr-e-rozgar

kitne hi wardat mein uljha hua hun main

fursat kahan banaun marasim nae nae

pichhle talluqat mein uljha hua hun main

sab hain asir-e-ranj-o-alam is jahan mein

tanha kahan hayat mein uljha hua hun main

'nayab' jab nahin hai wafaon ka us ko pas

phir kyun takallufat mein uljha hua hun main