apne hone key jhalak deta hai

apne hone key jhalak detā hai

fan kahīñ bhī ho chamak detā hai

phuul us ko bhī mahak detā hai

haath jo us ko jhaTak detā hai

ġhair tinkā bhī uchak detā hai

apnā to apne key Dhak detā hai

aap añdheroñ kā gila karte haiñ

chāñd taare bhī falak detā hai

pahle jī bhar ke jalātā hai mujhe

aur phir bād-e-ḳhunuk detā hai

jo shajar chāhtā hai phuul aur phal

apnī shāḳhoñ ko lachak detā hai

ab bhī sharmātā hai sājan merā

ab bhī āñkhoñ ko jhapak detā hai

zaḳhm to pahle bhī detā thā vo

āj-kal saath namak detā hai

niiñd vo bhī to hasīñ hai 'ulfat'

jab zarā baap thapak detā hai

apne hone key jhalak deta hai

fan kahin bhi ho chamak deta hai

phul us ko bhi mahak deta hai

hath jo us ko jhaTak deta hai

ghair tinka bhi uchak deta hai

apna to apne key Dhak deta hai

aap andheron ka gila karte hain

chand tare bhi falak deta hai

pahle ji bhar ke jalata hai mujhe

aur phir baad-e-KHunuk deta hai

jo shajar chahta hai phul aur phal

apni shaKHon ko lachak deta hai

ab bhi sharmata hai sajan mera

ab bhi aankhon ko jhapak deta hai

zaKHm to pahle bhi deta tha wo

aaj-kal sath namak deta hai

nind wo bhi to hasin hai 'ulfat'

jab zara bap thapak deta hai