apne ko talash kar raha hun

apne ko talāsh kar rahā huuñ

apnī hī talab se Dar rahā huuñ

tum log ho āñdhiyoñ kī zad meñ

maiñ qaht-e-havā se mar rahā huuñ

ḳhud apne hī qalb-e-ḳhūñ-chakāñ meñ

ḳhanjar kī tarah utar rahā huuñ

ai shahr-e-ḳhayāl ke musāfir

kyā maiñ tirā ham-safar rahā huuñ

dīvār pe dā.ere haiñ kaise

ye kaun hai kis se Dar rahā huuñ

maiñ shabnam-e-chashm-e-tar se ai sub.h

kal raat bhī tar-ba-tar rahā huuñ

ik shaḳhs se talḳh-kām ho kar

har shaḳhs ko pyaar kar rahā huuñ

ai dajla-e-ḳhūñ zarā Thaharnā

is raah se maiñ guzar rahā huuñ

fariyād ki zer-e-sāya-e-gul

maiñ zahr-e-ḳhizāñ se mar rahā huuñ

apne ko talash kar raha hun

apni hi talab se Dar raha hun

tum log ho aandhiyon ki zad mein

main qaht-e-hawa se mar raha hun

KHud apne hi qalb-e-KHun-chakan mein

KHanjar ki tarah utar raha hun

ai shahr-e-KHayal ke musafir

kya main tera ham-safar raha hun

diwar pe daere hain kaise

ye kaun hai kis se Dar raha hun

main shabnam-e-chashm-e-tar se ai subh

kal raat bhi tar-ba-tar raha hun

ek shaKHs se talKH-kaam ho kar

har shaKHs ko pyar kar raha hun

ai dajla-e-KHun zara Thaharna

is rah se main guzar raha hun

fariyaad ki zer-e-saya-e-gul

main zahr-e-KHizan se mar raha hun