apne pahlu se wo ghairon ko uTha hi na sake

apne pahlū se vo ġhairoñ ko uThā hī na sake

un ko ham qissa-e-ġham apnā sunā hī na sake

zehn merā vo qayāmat ki do-ālam pe muhīt

aap aise ki mire zehn meñ aa hī na sake

dekh lete jo unheñ to mujhe rakhte ma.azūr

shaiḳh-sāhib magar us bazm meñ jā hī na sake

aql mahñgī hai bahut ishq ḳhilāf-e-tahzīb

dil ko is ahd meñ ham kaam meñ lā hī na sake

ham to ḳhud chāhte the chain se baiTheñ koī dam

aap kī yaad magar dil se bhulā hī na sake

ishq kāmil hai usī kā ki patañgoñ kī tarah

taab nazzāra-e-ma.asūq kī lā hī na sake

dām-e-hastī kī bhī tarkīb ajab rakkhī hai

jo phañse us meñ vo phir jaan bachā hī na sake

maz.har-e-jalva-e-jānāñ hai har ik shai 'akbar'

be-adab aañkh kisī samt uThā hī na sake

aisī mantiq se to dīvāngī behtar 'akbar'

ki jo ḳhāliq kī taraf dil ko jhukā hī na sake

apne pahlu se wo ghairon ko uTha hi na sake

un ko hum qissa-e-gham apna suna hi na sake

zehn mera wo qayamat ki do-alam pe muhit

aap aise ki mere zehn mein aa hi na sake

dekh lete jo unhen to mujhe rakhte mazur

shaiKH-sahib magar us bazm mein ja hi na sake

aql mahngi hai bahut ishq KHilaf-e-tahzib

dil ko is ahd mein hum kaam mein la hi na sake

hum to KHud chahte the chain se baiThen koi dam

aap ki yaad magar dil se bhula hi na sake

ishq kaamil hai usi ka ki patangon ki tarah

tab nazzara-e-masuq ki la hi na sake

dam-e-hasti ki bhi tarkib ajab rakkhi hai

jo phanse us mein wo phir jaan bacha hi na sake

mazhar-e-jalwa-e-jaanan hai har ek shai 'akbar'

be-adab aankh kisi samt uTha hi na sake

aisi mantiq se to diwangi behtar 'akbar'

ki jo KHaliq ki taraf dil ko jhuka hi na sake