apni dida-wari se Darti hun

apnī dīda-varī se Dartī huuñ

varna maiñ kab kisī se Dartī huuñ

asl se naqal baḌh na jaa.e kahīñ

fan-e-sūrat-garī se Dartī huuñ

mujh ko itnā ḳhudā kā ḳhauf nahīñ

jitnā maiñ aadmī se Dartī huuñ

dostī kī to baat hī na karo

maiñ bahut dostī se Dartī huuñ

tīrgī to mirī muhāfiz hai

ham-nafas raushnī se Dartī huuñ

jis ko insāniyat se pyaar na ho

aise har aadmī se Dartī huuñ

Duub jā.ūñ na maiñ ḳhudī meñ kahīñ

is liye is ḳhudī se Dartī huuñ

ḳhud kahīñ dil kahīñ dimāġh kahīñ

maiñ tirī bandagī se Dartī huuñ

maslahat se jo kaam lete haiñ

un kī kam-himmatī se Dartī huuñ

le na Duube tujhe ye ai 'rūmī'

maiñ tirī ḳhud-sarī se Dartī huuñ

apni dida-wari se Darti hun

warna main kab kisi se Darti hun

asl se naqal baDh na jae kahin

fan-e-surat-gari se Darti hun

mujh ko itna KHuda ka KHauf nahin

jitna main aadmi se Darti hun

dosti ki to baat hi na karo

main bahut dosti se Darti hun

tirgi to meri muhafiz hai

ham-nafas raushni se Darti hun

jis ko insaniyat se pyar na ho

aise har aadmi se Darti hun

Dub jaun na main KHudi mein kahin

is liye is KHudi se Darti hun

KHud kahin dil kahin dimagh kahin

main teri bandagi se Darti hun

maslahat se jo kaam lete hain

un ki kam-himmati se Darti hun

le na Dube tujhe ye ai 'rumi'

main teri KHud-sari se Darti hun