apni hasti ko andhe kunen mein girana nahin chahta

apnī hastī ko andhe kuñ.eñ meñ girānā nahīñ chāhtā

maiñ haqīqat-pasandī ko suulī chaḌhānā nahīñ chāhtā

dar-ba-dar huuñ to sher-o-suḳhan ke liye yā shikam ke liye

varna maiñ ghar se bāhar galī tak bhī aanā nahīñ chāhtā

maiñ ne minnat nahīñ maan rakkhī daraḳhtoñ se girtā rahūñ

maiñ kisī shāḳh par koī tinkā sajānā nahīñ chāhtā

ho ga.ī hai tujhe is qadar mujh se nafrat to soyā na kar

maiñ to ḳhud tere jaisoñ ke ḳhvāboñ meñ aanā nahīñ chāhtā

merī koshish yahī hai ki zindoñ ko saaya farāham karūñ

maiñ kisī qabr par koī paudā lagānā nahīñ chāhtā

maiñ 'shanāvar' tirī qadr kartā huuñ dil se magar jaane kyuuñ

apnī aulād ko tere jaisā banānā nahīñ chāhtā

apni hasti ko andhe kunen mein girana nahin chahta

main haqiqat-pasandi ko suli chaDhana nahin chahta

dar-ba-dar hun to sher-o-suKHan ke liye ya shikam ke liye

warna main ghar se bahar gali tak bhi aana nahin chahta

main ne minnat nahin man rakkhi daraKHton se girta rahun

main kisi shaKH par koi tinka sajaana nahin chahta

ho gai hai tujhe is qadar mujh se nafrat to soya na kar

main to KHud tere jaison ke KHwabon mein aana nahin chahta

meri koshish yahi hai ki zindon ko saya faraham karun

main kisi qabr par koi pauda lagana nahin chahta

main 'shanawar' teri qadr karta hun dil se magar jaane kyun

apni aulad ko tere jaisa banana nahin chahta