apni hi aarzuon se ek jang hai hayat

apnī hī ārzūoñ se ik jang hai hayāt

bas yuuñ samajh lo dast-e-tah-e-sang hai hayāt

kyoñ marg-e-nā-gahāñ ko pukāreñ ki āj-kal

marne kā ek aur nayā Dhang hai hayāt

ai nāsehān-e-asr jiye jā rahe ho kyoñ

jab jurm hai gunāh hai aur nang hai hayāt

haiñ tere bāġhiyoñ pe zamāne kī ne.amateñ

tere jo haiñ unhīñ pe bahut tang hai hayāt

ai sakinān-e-farsh-e-gulistāñ idhar bhī aao

mere ufuq pe dekho lahū-rang hai hayāt

apnī salīb apne hī shānoñ pe laa.e ham

hairāñ idhar hai maut udhar dang hai hayāt

'shā.ir' hayāt-o-maut ke rishte qadīm haiñ

hai maut ik sukūt to āhang hai hayāt

apni hi aarzuon se ek jang hai hayat

bas yun samajh lo dast-e-tah-e-sang hai hayat

kyon marg-e-na-gahan ko pukaren ki aaj-kal

marne ka ek aur naya Dhang hai hayat

ai nasehan-e-asr jiye ja rahe ho kyon

jab jurm hai gunah hai aur nang hai hayat

hain tere baghiyon pe zamane ki neamaten

tere jo hain unhin pe bahut tang hai hayat

ai sakinan-e-farsh-e-gulistan idhar bhi aao

mere ufuq pe dekho lahu-rang hai hayat

apni salib apne hi shanon pe lae hum

hairan idhar hai maut udhar dang hai hayat

'shair' hayat-o-maut ke rishte qadim hain

hai maut ek sukut to aahang hai hayat