apni hi sada sunun kahan tak

apnī hī sadā sunūñ kahāñ tak

jañgal kī havā rahūñ kahāñ tak

har baar havā na hogī dar par

har baar magar uThūñ kahāñ tak

dam ghaTtā hai ghar meñ habs vo hai

ḳhushbū ke liye rukūñ kahāñ tak

phir aa ke havā.eñ khol deñgī

zaḳhm apne rafū karūñ kahāñ tak

sāhil pe samundaroñ se bach kar

maiñ naam tirā likhūñ kahāñ tak

tanhā.ī kā ek ek lamha

hañgāmoñ se qarz luuñ kahāñ tak

gar lams nahīñ to lafz hī bhej

maiñ tujh se judā rahūñ kahāñ tak

sukh se bhī to dostī kabhī ho

dukh se hī gale milūñ kahāñ tak

mansūb ho har kiran kisī se

apne hī liye jalūñ kahāñ tak

āñchal mire bhar ke phaT rahe haiñ

phuul us ke liye chunūñ kahāñ tak

apni hi sada sunun kahan tak

jangal ki hawa rahun kahan tak

har bar hawa na hogi dar par

har bar magar uThun kahan tak

dam ghaTta hai ghar mein habs wo hai

KHushbu ke liye rukun kahan tak

phir aa ke hawaen khol dengi

zaKHm apne rafu karun kahan tak

sahil pe samundaron se bach kar

main nam tera likhun kahan tak

tanhai ka ek ek lamha

hangamon se qarz lun kahan tak

gar lams nahin to lafz hi bhej

main tujh se juda rahun kahan tak

sukh se bhi to dosti kabhi ho

dukh se hi gale milun kahan tak

mansub ho har kiran kisi se

apne hi liye jalun kahan tak

aanchal mere bhar ke phaT rahe hain

phul us ke liye chunun kahan tak