apni kitab-e-umr ka anjam likh diya

apnī kitāb-e-umr kā anjām likh diyā

pahle varaq pe maiñ ne tirā naam likh diyā

maiñ likhnā chāhtā thā koī phuul sī ġhazal

aur jab likhā to sirf tirā naam likh diyā

dil ne tire sivā na koī baat kī qubūl

sab kuchh ba-nām-e-gardish-e-ayyām likh diyā

rusvā.iyoñ ke moḌ pe tanhā khaḌā huuñ maiñ

apnā gunāh sab ne mire naam likh diyā

ham aise be-gharoñ ne jahāñ bhī kiyā qayām

ḳhat khīñch ke vahīñ pe dar-o-bām likh diyā

'ma.asūm' mujh ko is ne kiyā ā.ina-mizāj

lekin mire nasīb meñ ilzām likh diyā

apni kitab-e-umr ka anjam likh diya

pahle waraq pe main ne tera nam likh diya

main likhna chahta tha koi phul si ghazal

aur jab likha to sirf tera nam likh diya

dil ne tere siwa na koi baat ki qubul

sab kuchh ba-nam-e-gardish-e-ayyam likh diya

ruswaiyon ke moD pe tanha khaDa hun main

apna gunah sab ne mere nam likh diya

hum aise be-gharon ne jahan bhi kiya qayam

KHat khinch ke wahin pe dar-o-baam likh diya

'masum' mujh ko is ne kiya aaina-mizaj

lekin mere nasib mein ilzam likh diya