apni mohabbaton ko saliqa mile koi

apnī mohabbatoñ ko salīqa mile koī

is dard-e-lā-davā ko masīhā mile koī

ham ko ga.ī rutoñ kā navishta mile koī

aisā bhī ehtisāb kā lamha mile koī

barsoñ guzar ga.e haiñ isī intizār meñ

maiñ bhī sunūñ jo aap sā lahja mile koī

jhelīñ bahut haiñ rāh-e-mohabbat meñ saḳhtiyāñ

ye soch kar ki ham ko bhī apnā mile koī

ik umr mujh ko jāgtī āñkhoñ ne kyā diyā

so jā.ūñ aur ḳhvāb sā chehra mile koī

pahle samundaroñ se bhañvar ko nikāliye

phir kashtī-e-junūñ ko kinārā mile koī

apni mohabbaton ko saliqa mile koi

is dard-e-la-dawa ko masiha mile koi

hum ko gai ruton ka nawishta mile koi

aisa bhi ehtisab ka lamha mile koi

barson guzar gae hain isi intizar mein

main bhi sunun jo aap sa lahja mile koi

jhelin bahut hain rah-e-mohabbat mein saKHtiyan

ye soch kar ki hum ko bhi apna mile koi

ek umr mujh ko jagti aankhon ne kya diya

so jaun aur KHwab sa chehra mile koi

pahle samundaron se bhanwar ko nikaliye

phir kashti-e-junun ko kinara mile koi