apni palkon se uske ishaare uTha

apnī palkoñ se us ke ishāre uThā

os kī uñgliyoñ se sharāre uThā

aisā lagtā hai dohrā rahā huuñ maiñ kuchh

zindagī ke purāne shumāre uThā

raushnī kā vo kaisā ajab shor thā

is kināre huā us kināre uThā

āḳhirī hai safar vo subuk-sar chale

us ke dāman se apne sitāre uThā

aañkh kī us badan par lakīreñ khiñchīñ

har ġhazal se na.e isti.āre uThā

guftugū manzaroñ kī tarah khul ke ho

ab na tashbīh aur isti.āre uThā

terā maqsad hai kyā maiñ samajh jā.ūñgā

koī mausam hī kī baat pyāre uThā

rang se rang milne na paa.e kahīñ

ek ek kar ke saare nazāre uThā

jhiil patvār vāpas na degī kabhī

apnī kashtī ab apne sahāre uThā

aag ke ik qalam kī siyāhī lagā

jo dhuāñ 'nūr' gañgā kināre uThā

apni palkon se us ke ishaare uTha

os ki ungliyon se sharare uTha

aisa lagta hai dohra raha hun main kuchh

zindagi ke purane shumare uTha

raushni ka wo kaisa ajab shor tha

is kinare hua us kinare uTha

aaKHiri hai safar wo subuk-sar chale

us ke daman se apne sitare uTha

aankh ki us badan par lakiren khinchin

har ghazal se nae istiare uTha

guftugu manzaron ki tarah khul ke ho

ab na tashbih aur istiare uTha

tera maqsad hai kya main samajh jaunga

koi mausam hi ki baat pyare uTha

rang se rang milne na pae kahin

ek ek kar ke sare nazare uTha

jhil patwar wapas na degi kabhi

apni kashti ab apne sahaare uTha

aag ke ek qalam ki siyahi laga

jo dhuan 'nur' ganga kinare uTha