apni qismat mein gham-e-arsa-e-hijran hai to kya

apnī qismat meñ ġham-e-arsa-e-hijrāñ hai to kyā

ashk minnat-kash-e-gahvāra-e-mizhgāñ hai to kyā

husn arbāb-e-haqīqat ko hai nāzūra-e-haq

shaiḳh jī aap ko andesha-e-īmāñ hai to kyā

vaqt ke saath fuzūñ hotā hai ehsās-e-ziyāñ

fahm-o-idrāk hī ġhārat-gar-e-insāñ hai to kyā

be-muhābāna masarrat ke ta.āqub meñ na dauḌ

dām-e-nairañg pas-e-sarhad-e-imkāñ hai to kyā

ham to ik umr se haiñ muntazir-e-marg-e-ḳhizāñ

ab ke logoñ meñ agar zikr-e-bahārāñ hai to kyā

mausam aatā hai to kāñToñ hī meñ gul khilte haiñ

dast-e-gul-chīñ meñ agar nazm-e-gulistāñ hai to kyā

zer-e-ta.amīr isī haal meñ hai mustaqbil

is meñ kuchh reḳht kā pahlū bhī numāyāñ hai to kyā

apni qismat mein gham-e-arsa-e-hijran hai to kya

ashk minnat-kash-e-gahwara-e-mizhgan hai to kya

husn arbab-e-haqiqat ko hai nazura-e-haq

shaiKH ji aap ko andesha-e-iman hai to kya

waqt ke sath fuzun hota hai ehsas-e-ziyan

fahm-o-idrak hi ghaarat-gar-e-insan hai to kya

be-muhabana masarrat ke taaqub mein na dauD

dam-e-nairang pas-e-sarhad-e-imkan hai to kya

hum to ek umr se hain muntazir-e-marg-e-KHizan

ab ke logon mein agar zikr-e-bahaaran hai to kya

mausam aata hai to kanTon hi mein gul khilte hain

dast-e-gul-chin mein agar nazm-e-gulistan hai to kya

zer-e-tamir isi haal mein hai mustaqbil

is mein kuchh reKHt ka pahlu bhi numayan hai to kya