apni sari kawishon ko raegan maine kiya

apnī saarī kāvishoñ ko rā.egāñ maiñ ne kiyā

mere andar jo na thā us ko bayāñ maiñ ne kiyā

sar pe jab saayā rahā koī na daurān-e-safar

us kī yādoñ ko phir apnā sā.ebāñ maiñ ne kiyā

ab yahāñ par saañs tak lenā mujhe dushvār hai

kis tamannā par zamīñ ko āsmāñ maiñ ne kiyā

lamha lamha vaqt ke hāthoñ kiyā ḳhud ko supurd

sab gañvā baiThā to phir fikr-e-ziyāñ maiñ ne kiyā

jab na us ke aur mere darmiyāñ kuchh bhī rahā

ḳhud ko hī phir us ke apne darmiyāñ maiñ ne kiyā

donoñ chup the zor se chaltī havā ke sāmne

phir achānak ḳhushk pattoñ ko zabāñ maiñ ne kiyā

apni sari kawishon ko raegan main ne kiya

mere andar jo na tha us ko bayan main ne kiya

sar pe jab saya raha koi na dauran-e-safar

us ki yaadon ko phir apna saeban main ne kiya

ab yahan par sans tak lena mujhe dushwar hai

kis tamanna par zamin ko aasman main ne kiya

lamha lamha waqt ke hathon kiya KHud ko supurd

sab ganwa baiTha to phir fikr-e-ziyan main ne kiya

jab na us ke aur mere darmiyan kuchh bhi raha

KHud ko hi phir us ke apne darmiyan main ne kiya

donon chup the zor se chalti hawa ke samne

phir achanak KHushk patton ko zaban main ne kiya