apni surat ka hi didar dobara kar len

apnī sūrat kā hī dīdār dobāra kar leñ

Dūbte chāñd kā ham phir se nazāra kar leñ

zindagī itnī ġhanīmat to nahīñ jis ke liye

ahd-e-kam-zarf kī har baat gavāra kar leñ

shaiḳh jis 'ahd kī detā hai misāleñ ham ko

kaise us 'ahd ko ham zinda dobāra kar leñ

'umr bhar ahl-e-tarab luuT ke sāhil ke maze

kyā javāñ-mardī hai tūfāñ se kināra kar leñ

āsmānoñ pe to insān nahīñ rah sakte

jaise mumkin ho zamīñ par hī guzārā kar leñ

ab to bīmār-e-mohabbat kī hai hālat nāzuk

chārasāzoñ se kaho vo koī chārā kar leñ

jis ke īmāñ meñ hī insāñ se ho nafrat shāmil

kis tarah aise sitam-gar se guzāra kar leñ

ab to is shahr meñ aisā koī insān nahīñ

jis se mil kar hī kabhī zikr tumhārā kar leñ

Duub jaate haiñ ghaḌī pal meñ sitāre 'aslam'

kis tavaqqo pe use aañkh kā taara kar leñ

apni surat ka hi didar dobara kar len

Dubte chand ka hum phir se nazara kar len

zindagi itni ghanimat to nahin jis ke liye

ahd-e-kam-zarf ki har baat gawara kar len

shaiKH jis 'ahd ki deta hai misalen hum ko

kaise us 'ahd ko hum zinda dobara kar len

'umr bhar ahl-e-tarab luT ke sahil ke maze

kya jawan-mardi hai tufan se kinara kar len

aasmanon pe to insan nahin rah sakte

jaise mumkin ho zamin par hi guzara kar len

ab to bimar-e-mohabbat ki hai haalat nazuk

chaarasazon se kaho wo koi chaara kar len

jis ke iman mein hi insan se ho nafrat shamil

kis tarah aise sitam-gar se guzara kar len

ab to is shahr mein aisa koi insan nahin

jis se mil kar hi kabhi zikr tumhaara kar len

Dub jate hain ghaDi pal mein sitare 'aslam'

kis tawaqqo pe use aankh ka tara kar len