apnon ke darmiyan hai magar be-aman sa

apnoñ ke darmiyāñ hai magar be-amān sā

dil bhī sitam-rasīda hai hindostān sā

nā-mehrbāñ hai vaqt magar ek mehrbāñ

sāya-fagan hai sar pe mire āsmān sā

aġhyār tang-dil haiñ to apne munāfiqīn

merā bhī haal zaar hai urdu zabān sā

muhtāt qurbatoñ kā maza hī ajiib hai

maiñ ḳhush-gumān sā huuñ na to bad-gumān sā

ālām-o-sānehāt-o-havādis ke rū-ba-rū

kab tak ye musht-e-ḳhāk banegā chaTān sā

sail-e-shikast-e-ḳhvāb guzar to gayā magar

āñkhoñ meñ rah gayā hai lahū kā nishān sā

apnā safar havāoñ ke rahm-o-karam pe hai

hastī safīna-rang hai tan bādbān sā

is daur meñ sukūn-o-qarār-o-qiyām-e-amn

'ḳhālid' mujhe to lagtā hai vahm-o-gumān sā

apnon ke darmiyan hai magar be-aman sa

dil bhi sitam-rasida hai hindostan sa

na-mehrban hai waqt magar ek mehrban

saya-fagan hai sar pe mere aasman sa

aghyar tang-dil hain to apne munafiqin

mera bhi haal zar hai urdu zaban sa

muhtat qurbaton ka maza hi ajib hai

main KHush-guman sa hun na to bad-guman sa

aalam-o-sanehat-o-hawadis ke ru-ba-ru

kab tak ye musht-e-KHak banega chaTan sa

sail-e-shikast-e-KHwab guzar to gaya magar

aankhon mein rah gaya hai lahu ka nishan sa

apna safar hawaon ke rahm-o-karam pe hai

hasti safina-rang hai tan baadban sa

is daur mein sukun-o-qarar-o-qiyam-e-amn

'KHalid' mujhe to lagta hai wahm-o-guman sa