apnon ne ujaDa hai chaman jaan gae hain

apnoñ ne ujāḌā hai chaman jaan ga.e haiñ

pardoñ meñ chhupā kaun hai pahchān ga.e haiñ

taptī huī saḌkoñ pe safar ham ne kiyā hai

ab barf jo dekhī hai to ausān ga.e haiñ

vishvās kī girtī huī dīvār ke saa.e

qadmoñ se kuchalte hue īmān ga.e haiñ

maanā ki diyā us ne hameñ rutba-e-ālī

jannat se nikāle bhī to insān ga.e haiñ

ghar apnā samajh kar jo rahe farsh-e-zamīñ par

rote hue duniyā se vo mehmān ga.e haiñ

jo phuul kī ḳhushbū ko chhupāne meñ lage the

nākām mohabbat meñ vo insān ga.e haiñ

un se to na thī koī hameñ buġhz-o-adāvat

be-kār sī bātoñ ko burā maan ga.e haiñ

apnon ne ujaDa hai chaman jaan gae hain

pardon mein chhupa kaun hai pahchan gae hain

tapti hui saDkon pe safar hum ne kiya hai

ab barf jo dekhi hai to ausan gae hain

wishwas ki girti hui diwar ke sae

qadmon se kuchalte hue iman gae hain

mana ki diya us ne hamein rutba-e-ali

jannat se nikale bhi to insan gae hain

ghar apna samajh kar jo rahe farsh-e-zamin par

rote hue duniya se wo mehman gae hain

jo phul ki KHushbu ko chhupane mein lage the

nakaam mohabbat mein wo insan gae hain

un se to na thi koi hamein bughz-o-adawat

be-kar si baaton ko bura man gae hain