apnon se koi baat chhupai nahin jati

apnoñ se koī baat chhupā.ī nahīñ jaatī

ġhairoñ ko kabhī dil kī batā.ī nahīñ jaatī

lag jaatī hai ġhalatī se kabhī aag va-lekin

nā-dīda-o-dānista bujhā.ī nahīñ jaatī

ta.alīm sikhātī nahīñ aalim ko salīqa

tahzīb to jāhil ko sikhā.ī nahīñ jaatī

ruḳh garche havāoñ kā muāfiq bhī ho phir bhī

tūfān meñ qindīl jalā.ī nahīñ jaatī

sīdhī sī hai ye baat miyāñ aise musalsal

rone se muqaddar kī burā.ī nahīñ jaatī

ai sāhib-e-tadbīr ishāroñ se to hargiz

dīvār karāhat kī girā.ī nahīñ jaatī

mazlūm ke bahte hue pur-josh lahū se

tasvīr mohabbat kī banā.ī nahīñ jaatī

'abrār' samajhte nahīñ āsān hai bilkul

mushkil meñ paḌī jaan chhuḌā.ī nahīñ jaatī

apnon se koi baat chhupai nahin jati

ghairon ko kabhi dil ki batai nahin jati

lag jati hai ghalati se kabhi aag wa-lekin

na-dida-o-danista bujhai nahin jati

talim sikhati nahin aalim ko saliqa

tahzib to jahil ko sikhai nahin jati

ruKH garche hawaon ka muafiq bhi ho phir bhi

tufan mein qindil jalai nahin jati

sidhi si hai ye baat miyan aise musalsal

rone se muqaddar ki burai nahin jati

ai sahib-e-tadbir ishaaron se to hargiz

diwar karahat ki girai nahin jati

mazlum ke bahte hue pur-josh lahu se

taswir mohabbat ki banai nahin jati

'abrar' samajhte nahin aasan hai bilkul

mushkil mein paDi jaan chhuDai nahin jati