aqaed wahm hain mazhab KHayal-e-KHam hai saqi

aqā.ed vahm haiñ maz.hab ḳhayāl-e-ḳhām hai saaqī

azal se zehn-e-insāñ basta-e-auhām hai saaqī

haqīqat-āshnā.ī asl meñ gum-karda raahī hai

urūs-e-āgahī parvurda-e-ib.hām hai saaqī

mubārak ho za.īfī ko ḳhirad kī falsafa-rānī

javānī be-niyāz-e-ibrat-e-anjām hai saaqī

havas hogī asīr-e-halqa-e-nek-o-bad-e-ālam

mohabbat māvarā-e-fikr-e-nañg-o-nām hai saaqī

abhī tak rāste ke pech-o-ḳham se dil dhaḌaktā hai

mirā zauq-e-talab shāyad abhī tak ḳhaam hai saaqī

vahāñ bhejā gayā huuñ chaak karne parda-e-shab ko

jahāñ har sub.h ke dāman pe aks-e-shām hai saaqī

mire sāġhar meñ mai hai aur tire hāthoñ meñ barbat hai

vatan kī sar-zamīñ meñ bhuuk se kohrām hai saaqī

zamāna barsar-e-paikār hai pur-haul sho.aloñ se

tire lab par abhī tak naġhma-e-ḳhayyām hai saaqī

aqaed wahm hain mazhab KHayal-e-KHam hai saqi

azal se zehn-e-insan basta-e-auham hai saqi

haqiqat-ashnai asl mein gum-karda rahi hai

urus-e-agahi parwurda-e-ibham hai saqi

mubarak ho zaifi ko KHirad ki falsafa-rani

jawani be-niyaz-e-ibrat-e-anjam hai saqi

hawas hogi asir-e-halqa-e-nek-o-bad-e-alam

mohabbat mawara-e-fikr-e-nang-o-nam hai saqi

abhi tak raste ke pech-o-KHam se dil dhaDakta hai

mera zauq-e-talab shayad abhi tak KHam hai saqi

wahan bheja gaya hun chaak karne parda-e-shab ko

jahan har subh ke daman pe aks-e-sham hai saqi

mere saghar mein mai hai aur tere hathon mein barbat hai

watan ki sar-zamin mein bhuk se kohram hai saqi

zamana barsar-e-paikar hai pur-haul shoalon se

tere lab par abhi tak naghma-e-KHayyam hai saqi