aql ki jaan par ban aai hai

aql kī jaan par ban aa.ī hai

ishq se zor-āzmā.ī hai

husn-e-zā hai jamāl kā pindār

husn-e-pindār ḳhud-numā.ī hai

lājvantī ko hai gumān-e-nazar

ham ne dekhā nahīñ lajā.ī hai

jins-e-dil kā na thā koī gāhak

aap ne kis liye churā.ī hai

haath yārab duā meñ phailānā

qat-e-ehsās-e-nā-rasā.ī hai

qahr se aḳhz bhaap kī tāqat

husn se vasf-e-kahrubā.ī hai

DhūñDhtī haiñ vo munfa.il nazreñ

daad mahfil se uTh ke paa.ī hai

ishq kyā jurm hai ki iḳhfā ko

aap ne mushkil ye banā.ī hai

kah rahī hai hikāyat-e-taimūr

lañg uzr-e-shikasta-pā.ī hai

hai hamāre liye ḳhudā kaafī

aap ke vāste ḳhudā.ī hai

ḳhalq ke husn ḳhalq se behtar

aap kī vaz-e-kaj-adā.ī hai

aql ki jaan par ban aai hai

ishq se zor-azmai hai

husn-e-za hai jamal ka pindar

husn-e-pindar KHud-numai hai

lajwanti ko hai guman-e-nazar

hum ne dekha nahin lajai hai

jins-e-dil ka na tha koi gahak

aap ne kis liye churai hai

hath yarab dua mein phailana

qat-e-ehsas-e-na-rasai hai

qahr se aKHz bhap ki taqat

husn se wasf-e-kahrubai hai

DhunDhti hain wo munfail nazren

dad mahfil se uTh ke pai hai

ishq kya jurm hai ki iKHfa ko

aap ne mushkil ye banai hai

kah rahi hai hikayat-e-taimur

lang uzr-e-shikasta-pai hai

hai hamare liye KHuda kafi

aap ke waste KHudai hai

KHalq ke husn KHalq se behtar

aap ki waz-e-kaj-adai hai