aql-o-danish mein kisi se nahin kamtar hum log

aql-o-dānish meñ kisī se nahīñ kamtar ham log

vaqt vāqif hai ki haiñ kitne qad-āvar ham log

kaise Dar jā.eñge dhamkī se tirī ai nādāñ

kyā tū vāqif nahīñ haiñ kitne dilāvar ham log

ham musalmān haiñ aur paḌhte haiñ haq kā kalima

saarī duniyā ke taqābul meñ haiñ bartar ham log

garche muflis haiñ magar daulat-e-dīñ rakhte haiñ

dekh kar ham ko na samjheñ ki haiñ kamtar ham log

sāmne lashkar-e-bātil thā hazāroñ kā magar

DaT ga.e haq ke liye bas the bahattar ham log

mashvara baunoñ ko ye hai ki sadā had meñ raheñ

aur bhūleñ na ki haiñ kitne qad-āvar ham log

sāzisheñ ham ko Dubone kī rachātā hai adū

ai 'zakī' kah do ki haiñ ḳhuub shanāvar ham log

aql-o-danish mein kisi se nahin kamtar hum log

waqt waqif hai ki hain kitne qad-awar hum log

kaise Dar jaenge dhamki se teri ai nadan

kya tu waqif nahin hain kitne dilawar hum log

hum musalman hain aur paDhte hain haq ka kalima

sari duniya ke taqabul mein hain bartar hum log

garche muflis hain magar daulat-e-din rakhte hain

dekh kar hum ko na samjhen ki hain kamtar hum log

samne lashkar-e-baatil tha hazaron ka magar

DaT gae haq ke liye bas the bahattar hum log

mashwara baunon ko ye hai ki sada had mein rahen

aur bhulen na ki hain kitne qad-awar hum log

sazishen hum ko Dubone ki rachata hai adu

ai 'zaki' kah do ki hain KHub shanawar hum log