arz-o-sama fareb na ye bahr-o-bar fareb

arz-o-samā fareb na ye bahr-o-bar fareb

hai asl meñ ye saarā fareb-e-nazar fareb

pahle se ham gazīda-e-ahbāb haiñ bahut

is par ye mustazād ho tū bhī agar fareb

kis kis ko ro.eñ kūcha-e-be-e'tibār meñ

chārā fareb hai to kabhī chārāgar fareb

bāñdhā thā jo bhī ghar se vo zambīl meñ nahīñ

āḳhir ko de gayā hameñ zād-e-safar fareb

bāteñ hamārī aur to sab Thiik haiñ magar

haiñ un ke darmiyāñ ye agar aur magar fareb

hote haiñ aadmī se ye mānūs bhī bahut

dete haiñ ek din yahī dīvār-o-dar fareb

kyā kuchh nahīñ fareb jahān-e-fareb meñ

ye merā ijz aur tirā karr-o-far fareb

'nāmī' ye sab fareb fareb-e-fareb hai

'nāmī' idhar fareb hai 'nāmī' udhar fareb

arz-o-sama fareb na ye bahr-o-bar fareb

hai asl mein ye sara fareb-e-nazar fareb

pahle se hum gazida-e-ahbab hain bahut

is par ye mustazad ho tu bhi agar fareb

kis kis ko roen kucha-e-be-e'tibar mein

chaara fareb hai to kabhi chaaragar fareb

bandha tha jo bhi ghar se wo zambil mein nahin

aaKHir ko de gaya hamein zad-e-safar fareb

baaten hamari aur to sab Thik hain magar

hain un ke darmiyan ye agar aur magar fareb

hote hain aadmi se ye manus bhi bahut

dete hain ek din yahi diwar-o-dar fareb

kya kuchh nahin fareb jahan-e-fareb mein

ye mera ijz aur tera karr-o-far fareb

'nami' ye sab fareb fareb-e-fareb hai

'nami' idhar fareb hai 'nami' udhar fareb