ashaar mein mafhum fasane mein kahani

ash.ār meñ mafhūm fasāne meñ kahānī

mat DhūñD ki uljhāte haiñ alfāz-o-ma.ānī

sad shukr vo ta.abīr se mashrūt nahīñ thiiñ

bachpan meñ sunā karte the jo ḳhvāb kahānī

vo zindagī jo paane aur khone se sivā ho

zeb us ko nahīñ detī kabhī marsiya-ḳhvānī

fitrat ke taqāze pe na kar rāh-e-amal band

iqbāl kī ye baat kisī ne bhī na maanī

takmīl-e-junūñ ab bhī hai is misre se mashrūt

ai chāñd mubārak ho tujhe raat suhānī

ḳhush-hāliyāñ dehlī kī bajā aaj bhī lekin

yaad aatī hai kalkatte kī vo shoḳh javānī

pardes meñ bas zehn se ābād hai 'āsim'

dil se nahīñ kar paayā kabhī naql-e-makānī

ashaar mein mafhum fasane mein kahani

mat DhunD ki uljhate hain alfaz-o-maani

sad shukr wo tabir se mashrut nahin thin

bachpan mein suna karte the jo KHwab kahani

wo zindagi jo pane aur khone se siwa ho

zeb us ko nahin deti kabhi marsiya-KHwani

fitrat ke taqaze pe na kar rah-e-amal band

iqbaal ki ye baat kisi ne bhi na mani

takmil-e-junun ab bhi hai is misre se mashrut

ai chand mubarak ho tujhe raat suhani

KHush-haaliyan dehli ki baja aaj bhi lekin

yaad aati hai kalkatte ki wo shoKH jawani

pardes mein bas zehn se aabaad hai 'asim'

dil se nahin kar paya kabhi naql-e-makani