ashk aankhon mein jigar mein dard sozish dil mein hai

ashk āñkhoñ meñ jigar meñ dard sozish dil meñ hai

ik mohabbat kī badaulat ghar kā ghar mushkil meñ hai

jab na ye duniyā thī qaa.em tū hamāre dil meñ thā

jab se ye duniyā hai qaa.em tū hamāre dil meñ hai

iztirāb-e-teġh-e-maqtal meñ koī dekhe zarā

saaf hotā hai gumāñ bijlī kaf-e-qātil meñ hai

aaj un ke jaur ke shikve haiñ kyā kyā hashr meñ

aaj kaisī un kī rusvā.ī bharī mahfil meñ hai

naza.a meñ ai nā-murādī us kī tū rahnā gavāh

jo mire dil kī tamannā thī vo mere dil meñ hai

qatl ho kar bhī rahā qātil se qaa.em vāsta

ruuh merī ban ke jauhar ḳhanjar-e-qātil meñ hai

hoshiyār ai rahrav-e-rāh-e-mohabbat hoshiyār

har qadam par jaan kā khaTkā tirī manzil meñ hai

ai ḳhayāl-e-tark-e-ulfat qahr hai miT jā.egī

ye jo ik duniyā-e-ġham ābād mere dil meñ hai

naqs se ḳhālī nahīñ hote hasīñ bhī ai 'fahīm'

dekh tū sū-e-falak dhabba mah-e-kāmil meñ hai

ashk aankhon mein jigar mein dard sozish dil mein hai

ek mohabbat ki badaulat ghar ka ghar mushkil mein hai

jab na ye duniya thi qaem tu hamare dil mein tha

jab se ye duniya hai qaem tu hamare dil mein hai

iztirab-e-tegh-e-maqtal mein koi dekhe zara

saf hota hai guman bijli kaf-e-qatil mein hai

aaj un ke jaur ke shikwe hain kya kya hashr mein

aaj kaisi un ki ruswai bhari mahfil mein hai

naza mein ai na-muradi us ki tu rahna gawah

jo mere dil ki tamanna thi wo mere dil mein hai

qatl ho kar bhi raha qatil se qaem wasta

ruh meri ban ke jauhar KHanjar-e-qatil mein hai

hoshiyar ai rahraw-e-rah-e-mohabbat hoshiyar

har qadam par jaan ka khaTka teri manzil mein hai

ai KHayal-e-tark-e-ulfat qahr hai miT jaegi

ye jo ek duniya-e-gham aabaad mere dil mein hai

naqs se KHali nahin hote hasin bhi ai 'fahim'

dekh tu su-e-falak dhabba mah-e-kaamil mein hai