ashk-bari ka meri aankhon ne ye bandha hai jhaD

ashk-bārī kā mirī āñkhoñ ne ye bāñdhā hai jhaaḌ

Dūbte dikhlā.ī deñ haiñ tā-kamar saare pahāḌ

ġhair ko tū ne ishārat kī churā kar ham se aañkh

ham bhī ik ayyār haiñ pyāre ga.e fil-faur taaḌ

mujh ko kyā be-ḳhud kiyā saaqī kī chashm-e-mast ne

ik nigāh-e-tund se us ne safeñ Dālīñ pachhāḌ

un ko phir shor-e-qayāmat bhī uThā saktā nahīñ

mard rāh-e-ishq meñ jo baiThte haiñ paañv gaaḌ

ham to māyūs-e-rihā.ī is baras haiñ ham-safīr

bāl-o-par sayyād ne Daale qafas meñ sab ukhāḌ

jab talak dil meñ na ho ik shaḳhs kī ulfat ko raah

kholnā be-fā.eda hai dekh use ghar ke kivāḌ

vo jo lailā hai mire dil meñ sune us kā jo shor

qais nikle gor se bāhar kafan ko chīr-phāḌ

shaiḳh mai-ḳhāna kī mat chal raah mai-ḳhvāroñ se Dar

mil ke do bad-mast deñge aap kī saj vaañ bigāḌ

yaañ nafas meñ karte haiñ apnī par-afshānī kī sair

fariġhul-bāl ab haiñ gul-chīnī se ham dāman ko jhaaḌ

parda-e-mīnā meñ rakhtī hai sabhoñ se tāk-jhāñk

duḳhtar-e-raz se nahīñ dekhī koī gajjhī khilāḌ

suukh kar har ustuḳhvāñ juuñ ne hai us ke ishq meñ

sach hai jo mutrib pisar kā uThtā hai siine meñ haaḌ

chāñdnī meñ jab vo nau-ḳhat nīmcha le haath meñ

maah us ko dekh lene kī sipar le muñh pe aaḌ

apne rahne ko jo tū chāhe so kar un meñ pasand

do makāñ duniyā meñ haiñ ābād ik aur ik ujaaḌ

mai-kade meñ mast haiñ aur shor un kā haav ho

madrase meñ shaiḳh haiñ aur vā.e-vailā tauba dhaaḌ

shakl-e-mah us mehr-vash bin apnī nazroñ meñ 'muhib'

hai ye kuchh pur-dūd juuñ jhuktā hai bhaḌbhūnje kā bhaaḌ

ashk-bari ka meri aankhon ne ye bandha hai jhaD

Dubte dikhlai den hain ta-kamar sare pahaD

ghair ko tu ne ishaarat ki chura kar hum se aankh

hum bhi ek ayyar hain pyare gae fil-faur taD

mujh ko kya be-KHud kiya saqi ki chashm-e-mast ne

ek nigah-e-tund se us ne safen Dalin pachhaD

un ko phir shor-e-qayamat bhi uTha sakta nahin

mard rah-e-ishq mein jo baiThte hain panw gaD

hum to mayus-e-rihai is baras hain ham-safir

baal-o-par sayyaad ne Dale qafas mein sab ukhaD

jab talak dil mein na ho ek shaKHs ki ulfat ko rah

kholna be-faeda hai dekh use ghar ke kiwaD

wo jo laila hai mere dil mein sune us ka jo shor

qais nikle gor se bahar kafan ko chir-phaD

shaiKH mai-KHana ki mat chal rah mai-KHwaron se Dar

mil ke do bad-mast denge aap ki saj wan bigaD

yan nafas mein karte hain apni par-afshani ki sair

farighul-baal ab hain gul-chini se hum daman ko jhaD

parda-e-mina mein rakhti hai sabhon se tak-jhank

duKHtar-e-raz se nahin dekhi koi gajjhi khilaD

sukh kar har ustuKHwan jun ne hai us ke ishq mein

sach hai jo mutrib pisar ka uThta hai sine mein haD

chandni mein jab wo nau-KHat nimcha le hath mein

mah us ko dekh lene ki sipar le munh pe aaD

apne rahne ko jo tu chahe so kar un mein pasand

do makan duniya mein hain aabaad ek aur ek ujaD

mai-kade mein mast hain aur shor un ka haw ho

madrase mein shaiKH hain aur wae-waila tauba dhaD

shakl-e-mah us mehr-wash bin apni nazron mein 'muhib'

hai ye kuchh pur-dud jun jhukta hai bhaDbhunje ka bhaD