ashk bhejen mauj ubhaaren abr jari kijiye

ashk bhejeñ mauj ubhāreñ abr jaarī kījiye

mehrbāñ sail-e-balā kī ābyārī kījiye

ai charāġh-e-tāq-e-jānāñ ai havā-e-kū-e-dost

apnī kaifiyyat zarā ham par bhī taarī kījiye

shām-e-hijrāñ meñ sitāroñ ko na Thahrā.eñ sharīk

ā.īna-ḳhāne meñ aa kar ḳhud-shumārī kījiye

ashk-bārī sīna-chākī dil-ḳharāshī ho chukī

liije sāhib ishq kā farmān jaarī kījiye

hoñT kahte haiñ bahā diije lahū ash.ār meñ

zulf kahtī hai miyāñ tarkīb bhārī kījiye

dekhiye maah o sitāra ghūmiye arz o samā

chaliye bāhar bād-e-ḳhud-sar kī savārī kījiye

ishq kā aglā paḌāv maiñ huuñ maiñ duniyā-parast

al-madad ai qais ai farhād yaarī kījiye

yuuñ to malne se rahī ye saltanat so shahryār

paañv paḌ kar roiye minnat-gizārī kījiye

ashk bhejen mauj ubhaaren abr jari kijiye

mehrban sail-e-bala ki aabyari kijiye

ai charagh-e-taq-e-jaanan ai hawa-e-ku-e-dost

apni kaifiyyat zara hum par bhi tari kijiye

sham-e-hijran mein sitaron ko na Thahraen sharik

aaina-KHane mein aa kar KHud-shumari kijiye

ashk-bari sina-chaaki dil-KHarashi ho chuki

lije sahib ishq ka farman jari kijiye

honT kahte hain baha dije lahu ashaar mein

zulf kahti hai miyan tarkib bhaari kijiye

dekhiye mah o sitara ghumiye arz o sama

chaliye bahar baad-e-KHud-sar ki sawari kijiye

ishq ka agla paDaw main hun main duniya-parast

al-madad ai qais ai farhad yari kijiye

yun to malne se rahi ye saltanat so shahryar

panw paD kar roiye minnat-gizari kijiye