ashk-e-alam hai sozish-e-pinhan liye hue

ashk-e-alam hai sozish-e-pinhāñ liye hue

qatra hai apne zarf meñ tūfāñ liye hue

paidā kareñge ishq se ham ḳhud ilāj-e-ishq

baiThe raheñ vo dard kā darmāñ liye hue

hai terī baḳhshishoñ kā yaqīñ be-gumāñ magar

ham haiñ malāl tañgī-e-dāmāñ liye hue

ishrat kī vādiyoñ se guzartā chalā gayā

paiham fareb-e-umr-e-gurezāñ liye hue

vo paikar hijāb yahāñ aa.e kis tarah

ham haiñ hujūm-e-hasrat-o-armāñ liye hue

ye kaun aa rahā hai sar-e-shām ai 'sahar'

chehre pe nūr-e-sub.h-e-bahārāñ liye hue

ashk-e-alam hai sozish-e-pinhan liye hue

qatra hai apne zarf mein tufan liye hue

paida karenge ishq se hum KHud ilaj-e-ishq

baiThe rahen wo dard ka darman liye hue

hai teri baKHshishon ka yaqin be-guman magar

hum hain malal tangi-e-daman liye hue

ishrat ki wadiyon se guzarta chala gaya

paiham fareb-e-umr-e-gurezan liye hue

wo paikar hijab yahan aae kis tarah

hum hain hujum-e-hasrat-o-arman liye hue

ye kaun aa raha hai sar-e-sham ai 'sahar'

chehre pe nur-e-subh-e-bahaaran liye hue