ashk-e-gham shorish-e-pinhan ki KHabar dete hain

ashk-e-ġham shorish-e-pinhāñ kī ḳhabar dete haiñ

ye vo qatre haiñ jo tūfāñ kī ḳhabar dete haiñ

qalb-e-sozāñ meñ shab-o-roz machalte jazbāt

garmī-e-shauq-e-farāvāñ kī ḳhabar dete haiñ

in sisakte hue ġhunchoñ ko hiqārat se na dekh

ye tujhe nazm-e-gulistāñ kī ḳhabar dete haiñ

tere mai-ḳhāne ke dam toḌte aa.eñ saaqī

kisī taġh.īr-e-numāyāñ kī ḳhabar dete haiñ

vo ufuq par jo ujāle se nazar aate haiñ

āmad-e-sub.h-e-daraḳhshāñ kī ḳhabar dete haiñ

sehn-e-gulshan meñ ba-har-ān badalte hue rañg

ik na.e daur-e-bahārāñ kī ḳhabar dete haiñ

haq to ye hai ki ḳhalāoñ ke safar ai 'manshā'

azmat-e-rutba-e-insāñ kī ḳhabar dete haiñ

ashk-e-gham shorish-e-pinhan ki KHabar dete hain

ye wo qatre hain jo tufan ki KHabar dete hain

qalb-e-sozan mein shab-o-roz machalte jazbaat

garmi-e-shauq-e-farawan ki KHabar dete hain

in sisakte hue ghunchon ko hiqarat se na dekh

ye tujhe nazm-e-gulistan ki KHabar dete hain

tere mai-KHane ke dam toDte aaen saqi

kisi taghir-e-numayan ki KHabar dete hain

wo ufuq par jo ujale se nazar aate hain

aamad-e-subh-e-daraKHshan ki KHabar dete hain

sehn-e-gulshan mein ba-har-an badalte hue rang

ek nae daur-e-bahaaran ki KHabar dete hain

haq to ye hai ki KHalaon ke safar ai 'mansha'

azmat-e-rutba-e-insan ki KHabar dete hain