ashk in sipiyon mein bhar jaen

ashk in sīpiyoñ meñ bhar jaa.eñ

to vahāñ Dūbne guhar jaa.eñ

ḳhāmushī ab tirī vazāhat ko

tere mimbar se ham utar jaa.eñ

dasht sab ke liye nahīñ vahshat

kuchh talabgār apne ghar jaa.eñ

rāste mere paas baiTh raheñ

fāsle duur se guzar jaa.eñ

titliyāñ rañg jhaaḌ leñ apne

phir tire hoñT par utar jaa.eñ

ham bhī dariyā ke nā-dahinda haiñ

kashtiyāñ chhoḌ kar kidhar jaa.eñ

rā.egānī pe fātiha kahne

ham suhūlat kī qabr par jaa.eñ

zo.am shorīdgī ke maare hue

lafz āvāz par utar jaa.eñ

aaj bas ḳhāl-o-ḳhad uThā.e chaleñ

ḳhvāhisheñ ā.inoñ meñ dhar jaa.eñ

tū koī maz.haka nahīñ hai ki ham

dastaras meñ ḳhudā kī mar jaa.eñ

nā-rasā.ī kī chaah meñ 'ārish'

ābla-pā mire safar jaa.eñ

ashk in sipiyon mein bhar jaen

to wahan Dubne guhar jaen

KHamushi ab teri wazahat ko

tere mimbar se hum utar jaen

dasht sab ke liye nahin wahshat

kuchh talabgar apne ghar jaen

raste mere pas baiTh rahen

fasle dur se guzar jaen

titliyan rang jhaD len apne

phir tere honT par utar jaen

hum bhi dariya ke na-dahinda hain

kashtiyan chhoD kar kidhar jaen

raegani pe fatiha kahne

hum suhulat ki qabr par jaen

zoam shoridgi ke mare hue

lafz aawaz par utar jaen

aaj bas KHal-o-KHad uThae chalen

KHwahishen aainon mein dhar jaen

tu koi mazhaka nahin hai ki hum

dastaras mein KHuda ki mar jaen

na-rasai ki chah mein 'arish'

aabla-pa mere safar jaen