ashk-uftada nazar aate hain sare dariya

ashk-uftāda nazar aate haiñ saare dariyā

sail-e-girya ne ye nazroñ se utāre dariyā

dekh leñ gar mirī ashkoñ ke sharāre dariyā

ḳhushk barsāt meñ hoñ ḳhauf ke maare dariyā

donoñ chashmoñ se mirī ashk bahā karte haiñ

mauj-zan rahtā hai dariyā ke kināre dariyā

raġhbat is tark ko machhlī ke kabāboñ se nahīñ

ātish-e-shauq se sheḳhī na baghāre dariyā

kaam ashkoñ kī ravānī se na niklā āḳhir

justujū-e-dur-e-maqsūd meñ haare dariyā

jis ko izzat de use phir na kare be-izzat

kulah-e-sar na habāboñ kī utāre dariyā

saath ġhairoñ ke vahāñ tum to nahāne ko ga.e

ro.e yaañ ham ġham-e-furqat meñ tumhāre dariyā

hāsil-e-gauhar-e-maqsūd hai rone se mujhe

dīda-e-tar ke badaulat hai ijāre dariyā

aañkh se mujh ko bulātā nahīñ vo qulzum-e-husn

chashm-e-girdāb se kartā hai ishāre dariyā

bār-e-ulfat ko jo le sar pe to nikle na kasak

tā-qayāmat kamar-e-koh jo dhāre dariyā

jab maiñ rotā huuñ nazar aatā hai paanī paanī

dam-e-girya mirī āñkhoñ ke haiñ taare dariyā

furqat-e-yār meñ kyā sair kareñ dariyā kī

ai 'sabā' dīda-e-giryāñ haiñ hamāre dariyā

ashk-uftada nazar aate hain sare dariya

sail-e-girya ne ye nazron se utare dariya

dekh len gar meri ashkon ke sharare dariya

KHushk barsat mein hon KHauf ke mare dariya

donon chashmon se meri ashk baha karte hain

mauj-zan rahta hai dariya ke kinare dariya

raghbat is tark ko machhli ke kababon se nahin

aatish-e-shauq se sheKHi na baghaare dariya

kaam ashkon ki rawani se na nikla aaKHir

justuju-e-dur-e-maqsud mein haare dariya

jis ko izzat de use phir na kare be-izzat

kulah-e-sar na hababon ki utare dariya

sath ghairon ke wahan tum to nahane ko gae

roe yan hum gham-e-furqat mein tumhaare dariya

hasil-e-gauhar-e-maqsud hai rone se mujhe

dida-e-tar ke badaulat hai ijare dariya

aankh se mujh ko bulata nahin wo qulzum-e-husn

chashm-e-girdab se karta hai ishaare dariya

bar-e-ulfat ko jo le sar pe to nikle na kasak

ta-qayamat kamar-e-koh jo dhaare dariya

jab main rota hun nazar aata hai pani pani

dam-e-girya meri aankhon ke hain tare dariya

furqat-e-yar mein kya sair karen dariya ki

ai 'saba' dida-e-giryan hain hamare dariya