asir-e-bahr-o-bar koi nahin hai

asīr-e-bahr-o-bar koī nahīñ hai

jahāñ meñ muḳhtasar koī nahīñ hai

hai dhaḌkā sā mire siine meñ lekin

dar-e-ummīd par koī nahīñ hai

mirā saayā simaT aayā hai mujh meñ

mirā ab ham-safar koī nahīñ hai

havādis bhī vahīñ ham bhī vahīñ haiñ

magar ab chashm-e-tar koī nahīñ hai

nazar hī baam par merī nahīñ yā

nazar ke baam par koī nahīñ hai

ba-juz mere yahāñ merī vafā kā

havāla mo'atabar koī nahīñ hai

samajh kar soch kar dil meñ utarnā

yahāñ bāhar ko dar koī nahīñ hai

ḳhirad ke laakh qāsid haiñ to hoñge

junūñ kā nāma-bar koī nahīñ hai

mujhe apnāne vaale log 'tāhir'

bahut se haiñ magar koī nahīñ hai

asir-e-bahr-o-bar koi nahin hai

jahan mein muKHtasar koi nahin hai

hai dhaDka sa mere sine mein lekin

dar-e-ummid par koi nahin hai

mera saya simaT aaya hai mujh mein

mera ab ham-safar koi nahin hai

hawadis bhi wahin hum bhi wahin hain

magar ab chashm-e-tar koi nahin hai

nazar hi baam par meri nahin ya

nazar ke baam par koi nahin hai

ba-juz mere yahan meri wafa ka

hawala mo'atabar koi nahin hai

samajh kar soch kar dil mein utarna

yahan bahar ko dar koi nahin hai

KHirad ke lakh qasid hain to honge

junun ka nama-bar koi nahin hai

mujhe apnane wale log 'tahir'

bahut se hain magar koi nahin hai