asir-e-dasht-e-bala ka na majra kahna

asīr-e-dasht-e-balā kā na mājrā kahnā

tamām pūchhne vāloñ ko bas duā kahnā

ye kahnā raat guzartī hai ab bhī āñkhoñ meñ

tumhārī yaad kā qaa.em hai silsila kahnā

ye kahnā ab bhī sulagtā hai jism kā chandan

tumhārā qurb thā ik shola-e-hinā kahnā

ye kahnā chāñd utartā hai baam par ab bhī

magar nahīñ vo shab-e-māh kā mazā kahnā

ye kahnā masnad-e-shāḳh-e-numū pe thā jo kabhī

vo phuul sūrat-e-ḳhushbū bikhar gayā kahnā

ye kahnā qarya-e-jāñ meñ haiñ dam-ba-ḳhud sab log

tamām shahr huā maqtal-e-navā kahnā

ye kahnā hasrat ta.amīr ab bhī hai dil meñ

banā liyā hai makāñ to makāñ-numā kahnā

ye kahnā ham ne hī tūfāñ meñ Daal dī kashtī

qusūr apnā hai dariyā ko kyā burā kahnā

ye kahnā ho ga.e ham itne maslahat-andesh

chale jo lū to use abhī ḳhunuk havā kahnā

ye kahnā haar na maanī kabhī añdheroñ se

bujhe charāġh to dil ko jalā liyā kahnā

ye kahnā tum se bichhaḌ kar bikhar gayā 'tishna'

ki jaise haath se gir jaa.e ā.īna kahnā

asir-e-dasht-e-bala ka na majra kahna

tamam puchhne walon ko bas dua kahna

ye kahna raat guzarti hai ab bhi aankhon mein

tumhaari yaad ka qaem hai silsila kahna

ye kahna ab bhi sulagta hai jism ka chandan

tumhaara qurb tha ek shola-e-hina kahna

ye kahna chand utarta hai baam par ab bhi

magar nahin wo shab-e-mah ka maza kahna

ye kahna masnad-e-shaKH-e-numu pe tha jo kabhi

wo phul surat-e-KHushbu bikhar gaya kahna

ye kahna qarya-e-jaan mein hain dam-ba-KHud sab log

tamam shahr hua maqtal-e-nawa kahna

ye kahna hasrat tamir ab bhi hai dil mein

bana liya hai makan to makan-numa kahna

ye kahna hum ne hi tufan mein Dal di kashti

qusur apna hai dariya ko kya bura kahna

ye kahna ho gae hum itne maslahat-andesh

chale jo lu to use abhi KHunuk hawa kahna

ye kahna haar na mani kabhi andheron se

bujhe charagh to dil ko jala liya kahna

ye kahna tum se bichhaD kar bikhar gaya 'tishna'

ki jaise hath se gir jae aaina kahna