asir-e-halqa-e-gesu-e-KHuban ho nahin sakta

asīr-e-halqa-e-gesū-e-ḳhūbāñ ho nahīñ saktā

vo dil tū jis ko taskīñ de pareshāñ ho nahīñ saktā

tirī qudrat se hotā hai tirī hikmat se hotā hai

koī patthar kahīñ la.al-e-badaḳhshāñ ho nahīñ saktā

mohabbat ho ki nafrat ho ye dil ke khel haiñ saare

na chāhe dil to koī dushman-e-jāñ ho nahīñ saktā

chhupā lete haiñ bā-dil mehr-o-mah ko apne dāman meñ

charāġh-e-dāġh-e-ulfat zer-e-dāmāñ ho nahīñ saktā

musībat hī se qadr-e-āfiyat hotī hai duniyā meñ

na pesh aayā ho jis ko ġham vo shādāñ ho nahīñ saktā

vatan koī ho izzat jauhar-e-qābil se baḌhtī hai

gul-e-sahrā kā ham-sar ḳhār-e-bustāñ ho nahīñ saktā

dil-e-insāñ hai muhtāj-e-ziyā-e-āftāb-e-ishq

baġhair us ke kisī sūrat daraḳhshāñ ho nahīñ saktā

usī se iḳhtiyār-o-jabr kā mafhūm khultā hai

jo honā chāhtā hai koī insāñ ho nahīñ saktā

miTāyā tū ne ai 'mahrūm' har-ik naqsh-e-bātil ko

judā dil se tire kyuuñ dāġh-e-hirmāñ ho nahīñ saktā

asir-e-halqa-e-gesu-e-KHuban ho nahin sakta

wo dil tu jis ko taskin de pareshan ho nahin sakta

teri qudrat se hota hai teri hikmat se hota hai

koi patthar kahin lal-e-badaKHshan ho nahin sakta

mohabbat ho ki nafrat ho ye dil ke khel hain sare

na chahe dil to koi dushman-e-jaan ho nahin sakta

chhupa lete hain ba-dil mehr-o-mah ko apne daman mein

charagh-e-dagh-e-ulfat zer-e-daman ho nahin sakta

musibat hi se qadr-e-afiyat hoti hai duniya mein

na pesh aaya ho jis ko gham wo shadan ho nahin sakta

watan koi ho izzat jauhar-e-qabil se baDhti hai

gul-e-sahra ka ham-sar KHar-e-bustan ho nahin sakta

dil-e-insan hai muhtaj-e-ziya-e-aftab-e-ishq

baghair us ke kisi surat daraKHshan ho nahin sakta

usi se iKHtiyar-o-jabr ka mafhum khulta hai

jo hona chahta hai koi insan ho nahin sakta

miTaya tu ne ai 'mahrum' har-ik naqsh-e-baatil ko

juda dil se tere kyun dagh-e-hirman ho nahin sakta