asir-e-KHak bhi hun KHak se riha bhi hun main
asīr-e-ḳhāk bhī huuñ ḳhaak se rihā bhī huuñ maiñ
maiñ jī rahā huuñ to dekho marā paḌā bhī huuñ maiñ
maiñ ek lamha-e-hāzir bilā-siyāq-o-sabāq
aur apne lamha-e-hāzir kā hāfiza bhī huuñ maiñ
maiñ ek fard-e-saf-ārā ma.āshre ke ḳhilāf
aur ek fard meñ puurā muāshra bhī huuñ maiñ
nikal bhī aayā huuñ us kūcha-e-taġhāful se
aur us ke dar pe bahut sā paḌā huā bhī huuñ maiñ
maiñ apnī ḳhaak meñ lat-path paḌā huā huuñ abhī
magar na bhuul ki parvarda-e-havā bhī huuñ maiñ
kisī bhī lafz ke jaisā nahīñ hai lafz mirā
idhar-udhar se bahut sā kahā-sunā bhī huuñ maiñ
agarche Thiik se banda bhī maiñ nahīñ 'ehsās'
magar kabhī kabhī ik lamha-e-ḳhudā bhī huuñ maiñ
asir-e-KHak bhi hun KHak se riha bhi hun main
main ji raha hun to dekho mara paDa bhi hun main
main ek lamha-e-hazir bila-siyaq-o-sabaq
aur apne lamha-e-hazir ka hafiza bhi hun main
main ek fard-e-saf-ara maashre ke KHilaf
aur ek fard mein pura muashra bhi hun main
nikal bhi aaya hun us kucha-e-taghaful se
aur us ke dar pe bahut sa paDa hua bhi hun main
main apni KHak mein lat-path paDa hua hun abhi
magar na bhul ki parwarda-e-hawa bhi hun main
kisi bhi lafz ke jaisa nahin hai lafz mera
idhar-udhar se bahut sa kaha-suna bhi hun main
agarche Thik se banda bhi main nahin 'ehsas'
magar kabhi kabhi ek lamha-e-KHuda bhi hun main
- Book : Mohabbat Kar Ke Dekho Na (Pg. 100)
- Author : Farhat Ehsas
- Publication : Rekhta Publications (2019)
- Edition : First
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.