asir-e-zist bhala aur kaun hai main hun

asīr-e-zīst bhalā aur kaun hai maiñ huuñ

tabhī jo roz marā aur kaun hai maiñ huuñ

mirā ḳhayāl-zada aur kaun hai tū hai

zamīn jhiil havā aur kaun hai maiñ huuñ

sabhī haiñ dast-burīda sabhī haiñ fariyādī

saboñ kā dast-e-duā aur kaun hai maiñ huuñ

tumhāre baaġh meñ jis ne ye gul khilā.e haiñ

are vo bād-e-sabā aur kaun hai maiñ huuñ

use jo dekheñ vo āñkheñ nikālī jaatī haiñ

kise vo degā sazā aur kaun hai maiñ huuñ

lagī hai aag yahāñ mahz mere hone se

dhueñ ke saath chalā aur kaun hai maiñ huuñ

usī ne pūchh liyā kaun merā hāfiz hai

maiñ us se kah na sakā aur kaun hai maiñ huuñ

asir-e-zist bhala aur kaun hai main hun

tabhi jo roz mara aur kaun hai main hun

mera KHayal-zada aur kaun hai tu hai

zamin jhil hawa aur kaun hai main hun

sabhi hain dast-burida sabhi hain fariyaadi

sabon ka dast-e-dua aur kaun hai main hun

tumhaare bagh mein jis ne ye gul khilae hain

are wo baad-e-saba aur kaun hai main hun

use jo dekhen wo aankhen nikali jati hain

kise wo dega saza aur kaun hai main hun

lagi hai aag yahan mahz mere hone se

dhuen ke sath chala aur kaun hai main hun

usi ne puchh liya kaun mera hafiz hai

main us se kah na saka aur kaun hai main hun