asiran-e-qafas aisa to ho tarz-e-fughan apna

asīrān-e-qafas aisā to ho tarz-e-fuġhāñ apnā

ki ho sayyād ḳhud bhī rafta rafta ham-zabāñ apnā

kiye jā kaam haañ ai gardish-e-daur-e-zamāñ apnā

hameñ bhī dekhnā hai kaise miTtā hai nishāñ apnā

adū haiñ bijliyāñ apnī na dushman āsmāñ apnā

hameñ ḳhud apne hāthoñ phūñkte haiñ āshiyāñ apnā

na kho de sust-gāmī ham ko bāzi-gāh-e-hastī meñ

na gard-e-kārvāñ rah jaa.e ban kar kārvāñ apnā

chaman ke patte patte par haiñ yārab bijliyāñ qābiz

kahāñ le jaa.eñ murġhān-e-chaman ab āshiyāñ apnā

urūs-e-manzil-e-maqsūd mil hī jā.egī ik din

yūñhī chande rahā garjā vo paimā kārvāñ apnā

jalā deñ ham qafas kī titliyāñ sho.ala-navā.ī se

har ik murġh-e-chaman 'āsī' agar ho ham-zabāñ apnā

asiran-e-qafas aisa to ho tarz-e-fughan apna

ki ho sayyaad KHud bhi rafta rafta ham-zaban apna

kiye ja kaam han ai gardish-e-daur-e-zaman apna

hamein bhi dekhna hai kaise miTta hai nishan apna

adu hain bijliyan apni na dushman aasman apna

hamein KHud apne hathon phunkte hain aashiyan apna

na kho de sust-gami hum ko bazi-gah-e-hasti mein

na gard-e-karwan rah jae ban kar karwan apna

chaman ke patte patte par hain yarab bijliyan qabiz

kahan le jaen murghan-e-chaman ab aashiyan apna

urus-e-manzil-e-maqsud mil hi jaegi ek din

yunhi chande raha garja wo paima karwan apna

jala den hum qafas ki titliyan shoala-nawai se

har ek murgh-e-chaman 'asi' agar ho ham-zaban apna