asiran-e-qafas sehn-e-chaman ko yaad karte hain

asīrān-e-qafas sehn-e-chaman ko yaad karte haiñ

bhalā bulbul pe yuuñ bhī zulm ai sayyād karte haiñ

kamar kā tere jis dam naqsh ham ījād karte haiñ

to jaañ farmān aa kar ma.anī o bahzād karte haiñ

pas-e-murdan to rahne de zamīñ par ai sabā mujh ko

ki miTTī ḳhāksāroñ kī nahīñ barbād karte haiñ

dam-e-raftār aatī hai sadā pāzeb se terī

lahad ke ḳhastagāñ uTTho masīhā yaad karte haiñ

qafas meñ ab to ai sayyād apnā dil taḌaptā hai

bahār aa.ī hai murġhān-e-chaman fariyād karte haiñ

batā de ai nasīm-e-sub.h shāyad mar gayā majnūñ

ye kis ke phuul uThte haiñ jo gul fariyād karte haiñ

masal sach hai bashar kī qadar ne.amat ba.ad hotī hai

sunā hai aaj tak ham ko bahut vo yaad karte haiñ

lagāyā bāġhbāñ ne zaḳhm-e-kārī dil pe bulbul ke

garebāñ-chāk ġhunche haiñ to gul fariyād karte haiñ

'rasā' aage na likh ab haal apnī be-qarārī kā

ba-rañg-e-ġhuncha-lab mazmūñ tire fariyād karte haiñ

asiran-e-qafas sehn-e-chaman ko yaad karte hain

bhala bulbul pe yun bhi zulm ai sayyaad karte hain

kamar ka tere jis dam naqsh hum ijad karte hain

to jaan farman aa kar mani o bahzad karte hain

pas-e-murdan to rahne de zamin par ai saba mujh ko

ki miTTi KHaksaron ki nahin barbaad karte hain

dam-e-raftar aati hai sada pazeb se teri

lahad ke KHastagan uTTho masiha yaad karte hain

qafas mein ab to ai sayyaad apna dil taDapta hai

bahaar aai hai murghan-e-chaman fariyaad karte hain

bata de ai nasim-e-subh shayad mar gaya majnun

ye kis ke phul uThte hain jo gul fariyaad karte hain

masal sach hai bashar ki qadar neamat baad hoti hai

suna hai aaj tak hum ko bahut wo yaad karte hain

lagaya baghban ne zaKHm-e-kari dil pe bulbul ke

gareban-chaak ghunche hain to gul fariyaad karte hain

'rasa' aage na likh ab haal apni be-qarari ka

ba-rang-e-ghuncha-lab mazmun tere fariyaad karte hain