ata-e-abr se inkar karna chahiye tha

atā-e-abr se inkār karnā chāhiye thā

maiñ sahrā thī mujhe iqrār karnā chāhiye thā

lahū kī aañch denī chāhiye thī faisle ko

use phir naqsh-bar-dīvār karnā chāhiye thā

agar lafz o bayāñ sākit khaḌe the dūsrī samt

hamīñ ko ranj kā iz.hār karnā chāhiye thā

agar itnī muqaddam thī zarūrat raushnī kī

to phir saa.e se apne pyaar karnā chāhiye thā

samundar ho to us meñ Duub jaanā bhī ravā hai

magar dariyāoñ ko to paar karnā chāhiye thā

dil-e-ḳhush-fahm ko sub.h safar kī raushnī meñ

shab-e-ġham ke liye tayyār karnā chāhiye thā

shikast-e-zindagī kā aks ban kar rah gayā hai

vahī lamha jise shahkār karnā chāhiye thā

ata-e-abr se inkar karna chahiye tha

main sahra thi mujhe iqrar karna chahiye tha

lahu ki aanch deni chahiye thi faisle ko

use phir naqsh-bar-diwar karna chahiye tha

agar lafz o bayan sakit khaDe the dusri samt

hamin ko ranj ka izhaar karna chahiye tha

agar itni muqaddam thi zarurat raushni ki

to phir sae se apne pyar karna chahiye tha

samundar ho to us mein Dub jaana bhi rawa hai

magar dariyaon ko to par karna chahiye tha

dil-e-KHush-fahm ko subh safar ki raushni mein

shab-e-gham ke liye tayyar karna chahiye tha

shikast-e-zindagi ka aks ban kar rah gaya hai

wahi lamha jise shahkar karna chahiye tha